រដ្ឋាភិបាលកម្ពុជានៅមិនទាន់សម្រេចលើសំណើរបស់គណបក្សសង្គ្រោះជាតិ ដែលបានស្នើឲ្យលុបបំបាត់កម្លាំងសន្តិសុខខណ្ឌនោះនៅឡើយទេ។
អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បានលើកឡើងពីសារៈសំខាន់របស់សន្តិសុខខណ្ឌដែលលោកហៅថាប្រជាការពារ ថាមានតួនាទីសំខាន់សម្រាប់រៀបចំសន្តិសុខសណ្តាប់ធ្នាប់ ចរាចរណ៍ និងការងារមួយចំនួនទៀតក្នុងរាជធានីភ្នំពេញ។
លោកថា ការជ្រើសរើសកម្លាំងសន្តិសុខនេះ គឺមានការយល់ព្រមពីក្រសួងមហាផ្ទៃនិងក្រសួងមុខងារសាធារណៈ ហើយជាបុគ្គលិកមន្ត្រីជាប់កិច្ចសន្យាមកធ្វើការតាមខណ្ឌទាំង១២។
ឆ្លើយតបនឹងសំណើឲ្យផ្តន្ទាទោសអ្នកដឹកនាំកម្លាំងសន្តិសុខឈ្មោះ ជាម រដ្ឋា លោក មាន ចាន់យ៉ាដា អះអាងថា ករណីកំពុងស្ថិតនៅក្នុងនីតីវិធីអនុវត្តន៍ បន្ទាប់ពីមានការដាក់ពាក្យបណ្តឹងរបស់ លោក អំ សំអាត និងអ្នករងគ្រោះក្នុងថ្ងៃប្រាព្ធទិវាសិទ្ធិលំនៅដ្ឋានពិភពលោកកាលពីខែមុន។
សូមបញ្ជាក់ថាគណបក្សប្រឆាំងកាលពីថ្ងៃទី២៧ តុលា បានស្នើឲ្យក្រសួងមហាផ្ទៃលុបបំបាត់សន្តិសុខនៅតាមបណ្តាខណ្ឌនីមួយៗ ដែលគណបក្សនេះចាត់ទុកថាជាកម្លាំងខុសច្បាប់ដែលអាជ្ញាធររាជធានីភ្នំពេញប្រើដើម្បីបង្ក្រាបលើការជួបជុំ ការធ្វើបាតុកម្ម និងកូដកម្មដោយសន្តិវិធី៕