ក្នុងរយៈពេល ២៥ឆ្នាំនៃការដំណើរការពិនិត្យនិងព្យាបាលជំងឺដល់កុមារ និងស្រ្តីមានផ្ទៃពោះនៅកម្ពុជាមូលនិធិគន្ធាបុប្ផាបានចំណាយប្រាក់អស់ ៦៣២លានដុល្លារ ដែលពិនិត្យព្យាបាលជំងឺជិត ១៧លានករណី។
តាមសេចក្ដីប្រកាសព័ត៌មានរបស់ស្ថាបនិកមូលនិធិគន្ធាបុប្ផាលោក Beat Richner ដែលចុះផ្សាយនៅថ្ងៃទី ០២ ខែវិច្ឆិកា ជាថ្ងៃគំរប់ខួប២៥ឆ្នាំ ដែលមន្ទីរពេទ្យគន្ធាបុប្ផាពិនិត្យព្យាបាលជំងឺកុមារ និង ស្រ្តីមានផ្ទៃពោះចំនួន១៦ ៨២២ ២២៥ករណី ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅ ដែលក្នុងនោះកុមារមានជំងឺធ្ងន់ ១ ៨៥៣ ៥១០នាក់ ត្រូវបានដាក់ឲ្យសម្រាកព្យាបាល និង ស្រ្តីមានផ្ទៃពោះ ២៣៥ ៥៩១ នាក់ បានសម្រាលកូននៅក្នុងមន្ទីរសម្ភពនៃមន្តីរពេទ្យជ័យវរ័ន្មទី ៧ (គន្ធាបុប្ផាទី៣)។
តាមសេចក្ដីប្រកាសព័ត៌មានដដែលបន្តថាក្នុងរយៈពេល ២៥ឆ្នាំនេះ មូលនិធិគន្ធាបុប្ផាចំណាយប្រាក់អស់៦៣២លានដុល្លារ ពិនិត្យព្យាបាលគ្រួសារទីទល់ក្រគ្រប់ច្រកល្ហកដោយឥតគិតថ្លៃ ហើយត្រូវបានរដ្ឋាភិបាលបានចាត់ទុកថាបានចូលរួមដល់ការកាត់បន្ថយ «អត្រាស្លាប់របស់មាតា និងកុមារ» ៕