នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ នៅថ្ងៃនេះ បានផ្ញើសារធ្ងន់ៗទៅកាន់មេដឹកនាំភូមា អ្នកស្រី អ៊ុងសាន ស៊ូជី និងរដ្ឋាភិបាលរបស់អ្នកស្រី ចំពោះការធ្វើទុក្ខបុកម្នេញទៅលើជនជាតិភាគតិចមូស្លីមរ៉ូហ៊ីងយ៉ា។
ថ្លែងនៅឯវេទិកាសាមគ្គីភាពជាមួយជនជាតិរ៉ូហ៊ីងយ៉ាង នៅទីក្រុងគួឡាឡុំពួ នៅថ្ងៃនេះ លោក ណាជីប បានថ្លែងថា៖ “យើងចង់ប្រាប់ទៅអ្នកស្រី អ៊ុងសាន ស៊ូជី ថា ឆ្អែតឆ្អន់ហើយ”។
លោក ណាជីប បន្តថា លោកមិនខ្វល់ពីសេចក្ដីថ្លែងការណ៍របស់រដ្ឋាភិបាលភូមាដែលលើកឡើងថា ម៉ាឡេស៊ីគួរតែមិនលូកលាន់កិច្ចការផ្ទៃក្នុងរបស់ប្រទេសមួយនោះទេ។
កាលពីថ្ងៃសុក្រកន្លងមកនេះ រដ្ឋាភិបាលភូមាបានអំពាវនាវទៅដល់ម៉ាឡេស៊ី ឲ្យគោរពតាមគោលការណ៍អាស៊ានស្ដីពីការមិនលូកលាន់ក្នុងកិច្ចការផ្ទៃក្នុងរបស់ប្រទេសសមាជិក។
រហូតមកដល់ពេលនេះ ជនជាតិរ៉ូហ៊ីងយ៉ាជាង ៥ម៉ឺន ៦ពាន់នាក់ហើយ បានចុះបញ្ជីជាជនភៀសខ្លួនជាមួយទីភ្នាក់ងារជនជាតិភៀសខ្លួនអង្គការសហប្រជាជាតិ នៅប្រទេសម៉ាឡេស៊ី៕
