អាជីវករខ្មែរនៅផ្សាររុងគ្លឿប្រទេសថៃជាប់ច្រកទ្វាអន្ដរជាតិក្រុងប៉ោយប៉ែត ខេត្ដបន្ទាយមានជ័យ ឲ្យដឹងថា តូបលក់ដូររបស់ខ្មែរចំនួនពីរតូបនៅផ្សារនេះ ត្រូវបានអគ្គីភ័យឆាបឆេះនៅព្រឹកថ្ងៃទី៥ខែមករានេះ។
អាជីវករខ្មែរលក់ដូរនៅផ្សាររុងគ្លឿ លោក ផាន់ ណា ប្រាប់វីអូឌីថា អគ្គីភ័យបានកើតឡើងនៅម៉ោង៩ព្រឹកថ្ងៃទី៥ខែមករានេះ ប៉ុន្ដែលោកថាមិនដឹងពីមូលហេតុនៃការឆាបឆេះនេះទេ។ លោកបន្ដថាអគ្គីភ័យនេះ មិនមានគ្រោះថ្នាក់ដល់មនុស្សនិងរាលដាលដល់តូបលក់ផ្សេងទៀតនោះឡើយ ដោយសារសមត្ថកិច្ចថៃបានប្រើរថយន្ដពន្លត់ភ្លើងទាន់ពេលវេលា។ លោកបន្ដថា៖ «មិនមានអីរាលដាលទេ ព្រោះមានថៃ គេអន្ដរាគមន៍ទាន់ពេល ហើយឥឡូវរលត់ជាស្ថាពរអស់ហើយ»។
អភិបាលក្រុងប៉ោយប៉ែត លោក ង៉ោ ម៉េងជ្រួន មានប្រសាសន៍ថា អាជ្ញាធរខ្មែរមិនទាន់ទទួលព័ត៌មានពីការខូចខាតនិងបាត់បង់តូបលក់ដូររបស់ជនជាតិខ្មែរនៅឡើយទេ ដោយរងចាំការពិនិត្យជាក់ស្ដែង។លោកបន្ដថា៖ «បាទ ឆេះនៅតូបផ្សារថៃ ប៉ុន្ដែមិនទាន់ទទួលព័ត៌មានជាក់លាក់ មិនអាចធ្វើអត្ថាធិប្បាយបានទេព្រោះក្នុងនាមអាជ្ញាធរ ទាល់តែមានព័ត៌មានជាក់លាក់ផ្លូវការ បានយើងហ៊ានធ្វើអត្ថាធិប្បាយជូន ប៉ុន្ដែរឿងឆេះដឹងតែឆេះហើយ»។
គួរបញ្ជាក់ថា កាលពីថ្ងៃទី២០ ខែមិថុនា ឆ្នាំ២០១៦កន្លងមកនេះ តូបអាជីករនៅផ្សារររុងគ្លឿចំនួន៥តូប ក៏ត្រូវបានអគ្គីភ័យឆាបឆេះដូចគ្នានេះដែរ ដែលមន្ដ្រីជំនាញសង្ស័យឆ្លងចរន្ដអគ្គិសនី។ ការឆាបឆេះនេះ បន្ទាប់ពីអាជ្ញាធរថៃ ចុះត្រួតពិនិត្យទំនិញក្លែងក្លាយកម្មសិទ្ធិបញ្ញាឬបន្លំម៉ាកយីហោនៅផ្សារនោះ កាលពីខែកុម្ភៈ ឆ្នាំ២០១៦។ កាលណោះក្រុមអាជីវករខ្មែរបានប៉ះទង្គិចជាមួយសមត្ថកិច្ចថៃ បណ្ដាលឲ្យរថយន្ដមួយគ្រឿងខូចខាត និងអាជីវករខ្មែរពីរនាក់ត្រូវបានសមត្ថកិច្ចថៃចាប់បញ្ជូនទៅតុលាការ៕
