នគរបាលជាតិកម្ពុជា បានឲ្យដឹងថា យ៉ាងហោចណាស់មនុស្ស ៤នាក់ បានស្លាប់ និង ៨នាក់ទៀត បានរងរបួស នៅក្នុងគ្រោះថ្នាក់ចរាចរណ៍នៅទូទាំងប្រទេស កាលពីថ្ងៃម្សិលមិញនេះ។
របាយការណ៍គ្រោះថ្នាក់ចរាចរណ៍ដែលចុះផ្សាយលើវេបសាយអគ្គស្នងការនគរបាលជាតិ បានឲ្យដឹងថា គ្រោះថ្នាក់ចរាចរណ៍ ៦លើក បានកើតឡើងកាលពីថ្ងៃម្សិលមិញនេះ ដោយបានសម្លាប់មនុស្ស ៤នាក់ ខណៈមនុស្ស ៥នាក់រងរបួសធ្ងន់ និង ៣នាក់ទៀតរងរបួសស្រាល។
នគរបាលជាតិកម្ពុជា បានឲ្យដឹងបន្ថែមថា គិតចាប់ពីថ្ងៃទី០១ ដល់ថ្ងៃទី០៤ ខែកុម្ភៈនេះ គ្រោះថ្នាក់ចរាចរណ៍ ២៤លើក បានកើតឡើងនៅទូទាំងប្រទេស ដោយបានសម្លាប់មនុស្សដល់ទៅ ១៣នាក់ ខណៈមនុស្ស៣០នាក់ទៀតបានរងរបួស៕
