មន្ដ្រីជាច្រើនរូបត្រូវបានរដ្ឋាភិបាលផ្ដល់គោរមងារជា «សន្ដិបណ្ឌិត» នៃបណ្ឌិតសភានគរបាលកម្ពុជា ដោយរដ្ឋាភិបាលអះអាងថាពួកគេបានខិតខំយ៉ាងសកម្មក្នុងការដឹកនាំបញ្ជាកងកម្លាំងនគរបាលជាតិ។
យោងតាមព្រះរាជក្រឹត្យ ចុះថ្ងៃទី៣ ខែមេសា ឆ្នាំ២០១៧ ឲ្យដឹងថា ប្រមុខរដ្ឋស្ដីទី លោក សាយ ឈុំ បានផ្ដល់គោរមងារ «សន្ដិបណ្ឌិត» នៃបណ្ឌិតសភានគរបាលកម្ពុជា ដល់ថ្នាក់ដឹកនាំក្រសួងមហាផ្ទៃចំនួន១៣រូប ដែលទទួលបានសញ្ញាបត្រកិត្តិយស លើជំនាញពាក់ព័ន្ធនឹងវិស័យសន្តិសុខ និងសណ្ដាប់ធ្នាប់សាធារណៈ។
បើតាមព្រះរាជ្យក្រឹត្យ នាយឧត្តមសេនីយ៍ ដែលទទួលបានងារជា «សន្ដិបណ្ឌិត» ទាំងនោះ រួមមាន លោក នេត សាវឿន អគ្គស្នងការនៃអគ្គស្នងការនគរបាលជាតិ លោក សុខ ផល អគ្គនាយកនៃអគ្គនាយកដ្ឋានអន្ដោប្រវេសន៍ លោក ម៉ៅ ច័ន្ទតារា អគ្គនាយកនៃអគ្គនាយកដ្ឋានអត្តសញ្ញាណកម្ម លោក ខៀវ សុភ័គ នាយកខុទ្ទកាល័យក្រសួងមហាផ្ទៃ និងមន្ដ្រីជាន់ខ្ពស់ផ្សេងទៀត៕