លោកនាយករដ្ឋមន្ត្រី ហ៊ុន សែន បានបញ្ជាទៅស្ថាប័នពាក់ព័ន្ធត្រូវទិញយកបណ្តាញផ្គត់ផ្គង់ទឹកស្អាតពីវិស័យឯកជនមកគ្រប់គ្រង ដោយថាដើម្បីធានាក្នុងការកំណត់តម្លៃមួយសមរម្យជូនប្រជាពលរដ្ឋនៅតំបន់មួយចំនួន ដែលទើបកាត់ចូលក្នុងរាជធានីភ្នំពេញ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវរោងចក្រទឹកស្អាតនិរោធជំហានទី២ នៅ ខណ្ឌច្បារអពៅ នៅព្រឹកនេះ លោកនាយករដ្ឋមន្ត្រីហ៊ុន សែន បានថ្លែងថា បច្ចុប្បន្ននេះមានក្រុមហ៊ុនឯកជនមួយចំនួនបានបង្កើតបណ្តាញគ្រប់គ្រងទឹកស្អាត ដើម្បីលក់ចែកចាយឲ្យពលរដ្ឋមួយចំនួននៅបណ្តាខេត្តនានាមានតម្លៃថ្លៃ ខុសពីតម្លៃទឹកនៅក្នុងរាជធានីភ្នំពេញ។ ករណីនេះ លោកបញ្ជាទៅរដ្ឋាករទឹកស្វ័យត និងស្ថាប័នពាក់ព័ន្ធផ្សេងទៀត ត្រូវសហការទិញយកបណ្តាញផ្គត់ផ្គង់ទឹកស្អាតពីក្រុមហ៊ុនឯនទំាងនោះ ដើម្បីកំណត់តម្លៃឲ្យបានសមរម្យជូនពលរដ្ឋនៅតំបន់នោះ។ លោកផ្តល់ជាអនុសាសន៍ថា «សូមឲ្យរដ្ឋករទឹកភ្នំពេញទិញយកនូវបណ្តាញទឹកដែលវិស័យឯកជន បានវិនិយោគនូវបណ្តាឃុំ ដែលមុននេះជាឃុំនៅខេត្តកណ្តាល ត្រូវបានកាត់ចូលក្នុងទីក្រុងភ្នំពេញ ដូច្នេះយើងត្រូវបន្ថែមទុនមួយចំនួនទៀត ដើម្បីទិញយកនូវផ្នែកផ្គត់ផ្គង់ទឹក ដែលមុននេះវិស័យឯកជនបានវិនិយោគនៅទីនោះ ត្រូវបន្តការទិញយក ដើម្បីយើងបន្តជាមួយនឹងបណ្តាញទឹកដែលមានបច្ចុប្បន្ននេះ ហើយអនុវត្តនូវថ្លៃប្រហាក់ប្រហែលគ្នា»។
លើសពីនេះទៀតលោក ហ៊ុន សែន ក៏បានស្នើឲ្យរដ្ឋាករទឹក និងអគ្គិសនីកម្ពុជា ពិភាក្សាគ្នាក្នុងការទម្លាក់តម្លៃអគ្គិសនីសម្រាប់ការបូមទឹក ដើម្បីបានកាត់បន្ថយការចំណាយលើការប្រតិបត្តិការ ដោយថា ការបូមទឹកនៅពេលយប់គួរតែទទួលបានតម្លៃអគ្គិសនីទាប ព្រោះការផ្គត់ផ្គង់អគ្គិសនីនៅពេលយប់មានតម្លៃធូរថ្លៃ។
អ្នកប្រឹក្សាឯករាជ្យ ផ្នែកអភិបាលកិច្ច លោក សួន ប៊ុនស័ក្តិ យល់ថា លោក ហ៊ុន សែន មិនគួរបញ្ជាឬក៏ណែនាំទៅរដ្ឋករទឹកទិញបណ្តាញគ្រប់គ្រងទឹកពីក្រុមហ៊ុនឯកជននោះទេ ដោយលោកថា ស្ថាប័នរដ្ឋគួរតែ ពង្រឹងសេវាកម្មរបស់ខ្លួន ដើម្បីប្រកួតប្រជែងជាមួយក្រុមហ៊ុនឯកជន ដើម្បីទុកឲ្យពលរដ្ឋជ្រើសរើសសេវាកម្មដែលខ្លួនពេញចិត្តល្អជាង។ លោកនិយាយថា «ជារដ្ឋាភិបាលមិនចំាបាច់ចេញជាសេចក្តីណែនាំ ឬក៏ជាបទបញ្ជាទៅដល់ស្ថាប័នរដ្ឋករ ដែលជាស្ថាប័នរដ្ឋឲ្យទៅទិញ សហការជាមួយឯកជនទេ យើងគួរតែធ្វើការតាមឯកទេស តាមភាពជំនាញរៀងៗខ្លួនទៅ ហើយយើងបង្ហាញសេវ៉ាកម្មឲ្យប្រជាពលរដ្ឋហើយប្រជាពលរដ្ឋជាអ្នកពិចារណាមើលសេវ៉ាកម្មក្នុងការប្រើប្រាស់ ថាតើគេប្រើប្រាស់មួយណា ទុកឲ្យរដ្ឋធ្វើដោយរដ្ឋ ទុកឲ្យឯកជនធ្វើដោយឯកជនទៅ គេអាចបង្ហាញពីសេវ៉ាកម្មល្អរបស់គេរៀងៗខ្លួន តាមតែគេទៅ»។
ការដាក់ចេញវិធានការថ្មីលើតម្លៃទឹកដោយប្រមុខរដ្ឋាភិបាលនេះ ធ្វើឡើងស្របពេលដែលការបោះឆ្នោតឃុំ សង្កាត់នៅសល់តែជិតពីរខែទៀតប៉ុណ្ណោះ៕