ក្រសួងការបរទេសកម្ពុជា បង្ហាញការខកចិត្តចំពោះប្រតិភូសហភាពអឺរ៉ុបប្រចំាកម្ពុជា ដែលរិះគន់លើការបន្តឃុំខ្លួនមន្ត្រីសិទ្ធិមនុស្ស និងមន្ត្រី គ.ជ.ប ដោយថានេះ ជាការជ្រៀតជ្រែកកិច្ចការផ្ទៃក្នុងកម្ពុជា។
កាលពីថ្ងៃទី៤ខែឧសភាឆ្នាំ២០១៧ ម្សិលមិញ សហភាពអឺរ៉ុបបានចេញសេចក្តីថ្លែងការណ៍ប្រតិកម្មទៅនឹងការសម្រេចរបស់តុលាការកម្ពុជា ដែលនៅបន្ដឃុំខ្លួនមន្ដ្រីការពារសិទ្ធិមនុស្សរបស់អង្គការអាដហុកចំនួន៤រូប និងមន្ត្រីគ.ជ.ប ឲ្យជាប់ពន្ធនាគារ៦ខែបន្ថែមទៀត ខណៈពួកគេបានជាប់ឃុំជាង១ឆ្នាំហើយ ពោល ចាប់តាំងពីការសម្រេចឃុំខ្លួនលើកដំបូង កាលពីថ្ងៃទី២៨ខែមេសាឆ្នាំ២០១៦។
នៅក្នុងសេចក្តីថ្លៃការណ៍ចុះថ្ងៃទី៥ឧសភានេះ ក្រសួងការបរទេសកម្ពុជា ឲ្យដឹងថា តុលាការកម្ពុជាសម្រេចបន្តឃុំខ្លួនបណ្តោះអាសន្នលើមន្ត្រីសិទ្ធិមនុស្សអាដហុក៤រូប និងមន្ត្រី គ.ជ.ប មួយរូប បន្ថែម៦ខែទៀតនោះ គឺស្របតាមច្បាប់ជាតិ ដោយថា ចៅក្រមស៊ើបអង្កេតអាចសម្រេចពន្យាការឃុំខ្លួនជនត្រូវចោទមុនសវនាការចំនួន២ដង ដោយក្នុងរយៈពេល៦ខែ ក្នុង១ដង។
សេចក្តីថ្លៃងការណ៍ដដែលបានឲ្យដឹងទៀតថា ការរិះគន់របស់សហភាពអឺរ៉ុបជុំវិញករណីខាងលើនេះ ជាការរំលោភបំពានលើអនុសញ្ញាទីក្រុងវីយ៉ែន ស្តីពីទំនាក់ទំនងការទូត មាត្រា៤១(១) ដែល មាត្រាទី៤១(១) មានខ្លឹមសារថា រាល់បេសកកម្មកាទូតទំាងអស់មានកាតព្វកិច្ចគោរពច្បាប់ និងបទបញ្ជានានារបស់រដ្ឋដែលខ្លួនតំាងនៅ ហើយពួកគេមានកាតព្វកិច្ច មិនលូកដៃជ្រៀតជ្រែកកិច្ចការផ្ទៃក្នុងរបស់រដ្ឋនោះឡើយ។
ទោះជាបែបនេះក្តី សហភាពអឺរ៉ុប បានឲ្យដឹងដែរថា ការសម្រេចឃុំខ្លួនជាបណ្ណោះអាសន្នបន្ដទៀតនេះ គឺធ្វើឡើងតាមអំពើចិត្តរបស់អ្នកមានកាន់អំណាច និងទទូចឲ្យរដ្ឋាភិបាល និងតុលាការកម្ពុជាដោះលែងពួកគេឲ្យមានសេរីភាពឡើងវិញជាបន្ទាន់។ សហភាពអឺរ៉ុបថា រដ្ឋាភិបាលកម្ពុជាត្រូវគោរពសិទ្ធិជនជាប់ចោទទាំង៥នាក់ទាំងនោះ ដោយថាត្រូវអនុវត្តតាមឲ្យបានពេញលេញតាមច្បាប់ជាតិ និងកិច្ចព្រមព្រៀងនានា ដែលកម្ពុជាជាសមាជិកហត្ថលេខីផងដែរ។
សាស្ត្រាចារ្យនយោបាយលោក ឯម សុវណ្ណារ៉ា យល់ថា បើកម្ពុជាមិនគោរពតាមការលើកឡើងរបស់សហភាពអឺរ៉ុបទេ លោកថា សហគមន៍អន្តរជាតិ អាចដាក់សម្ពាធមកកម្ពុជាឲ្យគោរពសិទ្ធិមនុស្សផងដែរ។ លោកនិយាយថា «ជាដំបូង វាអាចមានការរិះគន់ពីអង្គការអន្តរជាតិនានា ដូចជា អង្គការថ្នាក់តំបន់របស់សហគមន៍អឺរ៉ុប ឬក៏រិះគន់ពីសហគមន៍អឺរ៉ុប ឬក៏អង្គការសហប្រជាជាតិ ជំហ៊ានបន្ទាប់នៅពេលដែលកម្ពុជាមិនមានការប្រែប្រួល ឬធ្វើតាមច្បាប់ដែលអង្គការសហប្រជាកំណត់ ឬក៏កម្ពុជា ជាសហជិកហត្ថលេខី មានការទទួលស្គាល់សិទ្ធិមនុស្ស ឬក៏ប្រជាធិបតេយ្យទេ ខ្ញុំគិតថា សហគមន៍អន្តរជាតិ គេមាន វិធានការផ្សេងៗទៀត ពាក់ព័ន្ធនឹងការដាក់ពិន័យ ឬក៏ការតម្រង់ទិសឲ្យកម្ពុជាគោរពតាម»។
កាលពីថ្ងៃទី២៨ខែមេសាឆ្នាំ២០១៦ អង្គភាពប្រឆាំងអំពើពុករលួយបានចាប់ខ្លួនមន្ត្រីអាដហុក៤រូប រួមមានលោក នី សុខា លោក យី សុខសាន លោក ណៃ វង់ដា លោកស្រី លឹម មន្នី និងមន្ត្រីគ.ជ.ប លោក នី ចរិយា។ បន្ទាប់មក តុលាការបានចោទប្រកាន់អ្នកការពារសិទ្ធិមនុស្សទាំងនោះពីបទសូកប៉ាន់សាក្សីតាមក្រមព្រហ្មទណ្ឌកម្ពុជា ខណៈដែលសមាគមនោះបានឲ្យលុយជាង២០០ដុល្លារ ទៅនារីអ៊ុតសក់ម្នាក់ ដែលមកស្វែងរកសេវាច្បាប់ ទាក់ទងនឹងការទម្លាយថា ស្តី្ររូបនោះ មានទំនាក់ទំនងស្នេហាលួចលាក់ជាមួយប្រធានគណបក្សប្រឆាំងលោក កឹម សុខា៕
