ចៅក្រមស៊ើបសួរសាលាដំបូងរាជធានីភ្នំពេញបានសម្រេចបិទការស៊ើបសួរ លើសំណុំរឿងលោក កឹម សុខា ប្រធានស្តីទីគណបក្សសង្រ្គោះជាតិ ពាក់ព័ន្ធនឹងការចោទប្រកាន់ពីបទមិនចូលខ្លួនទៅតុលាការ។
លិខិតជូនដំណឹងចុះថ្ងៃទី១ខែកក្កដា ចៅក្រមស៊ើបសួរ លោក ថាន់ ឡេង បានលើកឡើងថាខ្លួនបានសម្រេចបិទការស៊ើបសួរលើសំណុំរឿងលោក កឹម សុខា។ លិខិតមិនបានបញ្ជាក់ពីចំណាត់ការបន្តរបស់តុលាការលើលោក កឹម សុខា នោះទេ។
អ្នកនាំពាក្យសាលាដំបូងរាជធានីភ្នំពេញ លោក លី សុផាន់ណា មានប្រសាសន៍នៅថ្ងៃអង្គារនេះថាចៅក្រមស៊ើបសួរគ្រាន់តែជូនដំណឹងពីការបិទការស៊ើបសួរដល់ជនត្រូវចោទ។ លោកបន្ថែមថាចៅក្រមស៊ើបសួរត្រូវបញ្ជូនសំណុំរឿងទៅព្រះរាជអាជ្ញាដើម្បីធ្វើសេចក្តីសន្និដ្ឋានស្ថាពរ។
កាលពីថ្ងៃចន្ទ សាលាឧទ្ធរណ៍បានច្រានចោលបណ្តឹងទាស់របស់លោក កឹម សុខា ទាក់ទងនឹងការចោទប្រកាន់របស់ព្រះរាជអាជ្ញាលើលោក កឹម សុខា។ គួរបញ្ជាក់ថាលោក កឹម សុខា បានស្នាក់នៅក្នុងស្នាក់ការបក្សក្នុងសង្កាត់ចាក់អង្រែលើតាំងពីថ្ងៃទី២៦ខែឧសភា ក្រោយពីមានការប៉ុនប៉ងចាប់ខ្លួនរូបលោក។ លោក កឹម សុខា ត្រូវបានព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ ចោទប្រកាន់ថាប្រព្រឹត្តបទល្មើសជាក់ស្តែង ក្រោយពីបដិសេធមិនចូលទៅតាមការកោះរបស់តុលាការក្នុងនាមជាសាក្សីចនួនពីរលើក។ លោកអាចប្រឈមនឹងការជាប់ពន្ធនាគារពី១ទៅ៦ខែ ប្រសិនបើតុលាការរកឃើញកំហុស។
គណបក្សប្រឆាំងចាត់ទុកករណីនេះជារឿងនយោបាយ ហើយកំពុងស្វែងរកការចរចាជាមួយគណបក្សប្រជាជនកម្ពុជា ដើម្បីដោះស្រាយបញ្ហាទាំងនេះ៕ ដោយ ណយ ធានី និងស៊ុន ណារិន