ព្រះមហាក្សត្រនិងសម្តេចម៉ែ នៅព្រឹកថ្ងៃអង្គារនេះ យាងទៅទីក្រុងបេកាំង ប្រទេសចិន ដើម្បីពិនិត្យព្រះរាជសុខភាព។
ក្នុងព្រះរាជសាររបស់ព្រះករុណាព្រះបាទបរមនាថ នរោត្តម សីហមុនី ដែលចុះថ្ងៃទី១ ខែកក្កដា ព្រះអង្គមានព្រះរាជបន្ទូលថាព្រះអង្គនិងសម្តេចម៉ែ យាងទៅប្រទេសចិននៅព្រឹកថ្ងៃទី៥ខែកក្កដានេះ។ ព្រះអង្គបញ្ជាក់ថាសម្តេច សាយ ឈុំ ប្រធានព្រឹទ្ធសភា នឹងទទួលជួយព្រះអង្គក្នុងឋានៈជាប្រមុខរដ្ឋស្តីទីនៃព្រះរាជាណាចក្រកម្ពុជា។ ព្រះរាជសារមិនបានបញ្ជាក់ពីរយៈពេលនៃដំណើរព្យាបាលព្រះរាជសុខភាពនោះទេ។ ក្រៅពីពិនិត្យព្រះរាជសុខភាព ព្រះអង្គក៏នឹងបំពេញព្រះរាជទស្សនកិច្ចនៅប្រទេសចិនផងដែរ។
គួររំឭកថាព្រះបាទនរោត្តមសីហមុនី បានយាងទៅកាន់ប្រទេសចិនម្តងមកហើយកាលពីដើមខែមិថុនា ឆ្នាំ២០១៦ ដើម្បីយាងទៅបំពេញព្រះរាជទស្សនកិច្ចនិងជួបសំណេះសំណាលជាមួយនាយករដ្ឋមន្ត្រីនិងប្រធានាធិបតីចិន ដើម្បីពង្រឹងភាពជាដៃគូយុទ្ធសាស្ត្ររវាងកម្ពុជានិងចិន៕