គណបក្សសង្គ្រោះជាតិប្រកាសនៅម៉ោង១០ព្រឹកថ្ងៃចន្ទនេះថា ការហែញត្តិនៅតែបន្ត ដើម្បីលើកបញ្ហារបស់កម្ពុជាប្រាប់ទៅមន្ត្រីទូតជាភាគីហត្ថលេខីនៃសន្តិសញ្ញាទីក្រុងប៉ារីសឲ្យជួយដោះស្រាយ។
នៅម៉ោង១០ព្រឹកនេះ អ្នករៀបចំការហែក្បួននាំញត្តិចេញពីស្នាក់ការគណបក្សសង្គ្រោះជាតិនៅសង្កាត់ចាក់អង្រែលើ បានរៀបចំឲ្យអ្នកចូលរួមប្រមាណ២០០នាក់ឲ្យត្រៀមខ្លួនក្នុងការហែញត្តិទៅដាក់នៅតាមស្ថានទូត។ ប៉ុន្តែមន្ត្រីសង្គ្រោះជាតិមិនប្រកាសម៉ោងហែជាក់លាក់ទេ ខណៈកម្លាំងសមត្ថកិច្ចជាច្រើនបានដាក់របាំងបិទផ្លូវនានានៅជុំវិញស្នាក់ការកណ្តាលគណបក្សប្រឆាំងមួយនេះ។
រហូតដល់ម៉ោង១០ព្រឹកនេះ កម្លាំងសមត្ថកិច្ចនៅតែបន្តបិទផ្លូវនៅជិតស្នាក់ការកណ្តាលគណបក្សសង្គ្រោះជាតិ ចំណែកអ្នកធ្វើដំណើរជាច្រើននៅតែបន្តកកស្ទះតាំងពីព្រឹកមក៕ ដោយលោក ញឹម សុខន និង ពៅ មេត្តា
