សមត្ថកិច្ចខេត្តតាកែវកាលពីម្សិលមិញ បានរកឃើញអាវុធយុទ្ធភ័ណ្ឌមិនទាន់ផ្ទុះ សល់ពីសង្គ្រាមជាង៥០០គ្រាប់នៅស្រុកគីរីវង់ ហើយគ្រាប់ទាំងនេះត្រូវបានសមត្ថកិច្ចជំនាញយកទៅរក្សាទុកដើម្បីស្រាវជ្រាវបន្ត។
តាមការចុះផ្សាយរបស់អគ្គស្នងការដ្ឋាននគរបាលជាតិបានឲ្យដឹងថា គ្រាប់ដែលបន្សល់ពីសម័យសង្គ្រាមទាំងនោះរកឃើញនៅភូមិអំពក ឃុំអំពក ស្រុកគីរីវង់ គឺសមត្ថកិច្ចចុះស្រាវជ្រាវរកឃើញក្រោយពេលពលរដ្ឋរាយការណ៍។
សមត្ថកិច្ចឲ្យដឹងថា យុទ្ធភ័ណ្ឌមិនទាន់ផ្ទុះទាំងនោះមានដូចជា ប្រភេទគ្រាប់៨២មម ១គ្រាប់ គ្រាប់បែកដៃ ៣គ្រាប់ និងគ្រាប់កាំភ្លើងយន្តខូចគុណភាព ៥៣៤គ្រាប់។
ស្នងការនគរបាលខេត្តតាកែវ លោក សុខ សំណាង បានឲ្យដឹងថា ក្រោយពីទទួលដំណឹងនេះ លោក បញ្ជាឲ្យសមត្ថកិច្ចចុះទៅពិនិត្យនិងទំនាក់ទំនងទៅអាជ្ញាធរជាតិកម្ចាត់មីន យកទៅរក្សាទុកដើម្បីធ្វើការត្រួតពិនិត្យ៕
ម៉ាប់ ស៊ុយ [email protected]