អតីតមេដឹកនាំគណបក្សប្រឆំាង បានចោទមេដឹកនាំគណបក្សកាន់អំណាចថា កំពុងប្រើរបបផ្តាច់ការវាយគូប្រកួតរបស់ខ្លួនមុនការបោះឆ្នោតជាតិ ដោយថាដើម្បីឈានទៅបន្តកាន់អំណាចនៅអាណត្តិក្រោយ។
ការលើកឡើងនេះ បន្ទាប់ពីមេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចកម្ពុជាចាប់ខ្លួននៅយប់រំលងអធ្រាត្រ ឈានចូលថ្ងៃទី០៣ ខែកញ្ញានេះ នៅឯគេហដ្ឋានរបស់លោក ដោយរដ្ឋាភិបាលចោទថា ក្បត់ជាតិ និងឃុបឃិតជាមួយអាមេរិក ដើម្បីផ្ដួលរំលំរដ្ឋាភិបាលស្របច្បាប់។
ករណីនេះអតីតមេដឹកនាំគណបក្សសង្គ្រោះជាតិ លោក សម រង្ស៊ី បានបង្ហោះវីឌេអូលើហ្វេសប៊ុករបស់លោកនៅថ្ងៃទី៥ខែកញ្ញានេះថា លោកនាយករដ្ឋមន្ត្រី ហ៊ុន សែន បានបិទប្រព័ន្ធផ្សព្វផ្សាយ វិទ្យុ កាសែតឯករាជ្យ និងចាប់លោក កឹម សុខា ដាក់ពន្ធនាគារជាដើម។ ករណីនេះលោកថា លោក ហ៊ុន សែន កំពុងប្រើរបបផ្តាច់ការដូចសម័យលោក ប៉ុល ពត ដឹកនាំប្រទេសកម្ពុជាដែរ ដោយថាដើម្បីបន្តគ្រប់គ្រងអំណាចរបស់ខ្លួន។
លោកនិយាយថា «ខ្ញុំបានបង្ហាញហើយថា ហ៊ុន សែន និង ប៉ុល ពត ចេញមកពីសំបុកតែមួយ គឺសំបុកពួកជនកុម្មុយនីស្ត ផ្តាច់ការ ដែលម្តងបំរើចិន ម្តងបំរើយួន ឬក៏បំរើទំាងផលប្រយោជន៍ចិន និងផលប្រយោជន៍យួនដូចសព្វថ្ងៃដើម្បីពង្រឹងអំណាចផ្តាច់ការ និងអំពើពុករលួយរបស់ខ្លួន។ គេបិទបំាងមិនឲ្យប្រជារាស្ត្រខ្មែរ ជាពិសេសយុវជនជំនាន់ក្រោយយល់ដឹងពីប្រវត្តិសាស្ត្រប្រទេសកម្ពុជា ក្រុមដែលកាន់អំណាចសព្វថ្ងៃនៅប្រទេសកម្ពុជាគេមិនខ្វល់ទេ ពីខ្មែរខាតបង់ ទោះជាខាតបង់ដល់ណា ក៏គេមិនខ្វល់ដែរ ឲ្យតែក្រុមគេបានកាន់អំណាចតទៅទៀត»។
លោក សម រង្ស៊ី បានអះអាងថា អ្នកស្នេហាជាតិ និងអ្នកប្រជាធិបតេយ្យ ដែលគេតាមធ្វើបាបរាល់ថ្ងៃ មិនដែលធ្វើឲ្យបាត់បង់ទឹកដី ទ្រព្យសម្បត្តិជាតិ ធនធានធម្មជាតិ ព្រៃឈើ និងរ៉ែ នោះទេ។
អ្នកនាំពាក្យគណបក្សប្រជាជនកម្ពុជាលោក សួស យ៉ារ៉ា បានច្រានចោលការលើកឡើងរបស់លោក សម រង្ស៊ី ដែលថាគណបក្សកាន់អំណាចដឹកនាំប្រទេសដូច ប៉ុល ពត។ ចំណែកការចាប់ខ្លួនលោក កឹម សុខា អ្នកនាំពាក្យរូបនោះថា ទុកឲ្យតុលាការចាត់វិធានការច្បាប់។
លោកនិយាយថា «ប៉ុល ពត បន្ថយជីវិតប្រជាជន យើងបង្កើនជីវិតប្រជាជនកើនឡើងដល់ទៅបីដង បួនដងឯណោះ ជាចំណុចមួយដែលយើងមិនបាច់ឆ្លើយតបទៅនឹងបុគ្គលដែលគាត់គិតតែអវិជ្ជមាននោះទេ ចំណុចប្រជាធិបតេយ្យ កម្ពុជាត្រូវតែមានប្រជាធិបតេយ្យខ្លួនឯង ត្រូវតែមានអធិបតេយ្យខ្លួនឯង ហើយកម្ពុជាត្រូវតែម្ចាស់ការលើអនាគតប្រទេសរបស់ខ្លួន ដោយមិនបណ្តែតបណ្តោយឲ្យកម្ពុជាធ្លាក់ទៅ ក្នុងកណ្តាប់ដៃនៃការលូកលាន់របស់បរទេសទៀតទេ បញ្ហាពាក់ព័ន្ធលោក កឹម សុខា គឺជារឿងមួយ ដែលស្ថិតនៅក្នុងសមត្ថកិច្ចរបស់ខាងយុត្តិធម៌ ដូច្នេះពួកយើងខ្ញុំមិនមានអ្វីប៉ះពាល់ទេ មិនមានអ្វីត្រូវយក ធ្វើការវាយតម្លៃមុនការកាត់ទោសរបស់តុលាការទេ»។
មេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចកម្ពុជាចាប់ខ្លួនកាលពីម៉ោង ១២ និង ៣៥នាទីរំលងអធ្រាត្រ ឈានចូលថ្ងៃទី០៣ ខែកញ្ញានេះ នៅឯគេហដ្ឋានរបស់លោក និងបញ្ជូនទៅពន្ធនាគារត្រំពំាងថ្លុង ខេត្តកំពង់ចាម។ ក្រោយពីចាប់ខ្លួន ស្ថាប័នរដ្ឋមួយចំនួនបានចេញសេចក្តីថ្លែងការគំាទ្រនិងចំចាត់ការរបស់រដ្ឋាភិបាលលើលោក កឹម សុខា។
ប៉ុន្តែស្របពេលជាមួយគ្នានោះ សង្គមស៊ីវិលជាតិ និងសហគមន៍អន្តរជាតិ រួមទំាងគណបក្សប្រឆំាង បានចេញសេចក្តីថ្លែងការណ៍ជាបន្តបន្ទាប់ ថ្កោលទោសចំពោះវិធានការរបស់រដ្ឋាភិបាលក្នុងការចាប់ខ្លួនមេបក្សប្រឆំាងរូបនោះ ដោយថា ធ្វើឡើងដោយគ្មានដីកាចាប់ខ្លួន និងរំលោភបំពានលើអភ័យឯកសិទ្ធិសភា ដែលត្រូវបានធានាដោយរដ្ឋធម្មនុញ្ញ៕
