មេធាវីការពារក្តីលោក កឹម សុខា ដាក់ពាក្យបណ្តឹងឧទ្ធរណ៍ ប្រឆាំងនឹងសាលក្រមតុលាការក្រុងភ្នំពេញដែលកាត់ទោសឱ្យលោក កឹម សុខា ជាប់ពន្ធនាគារ៥ខែ និងពិន័យប្រាក់៨០ម៉ឺនរៀលពីបទបដិសេធមិនព្រមចូលខ្លួនក្នុងនាមជាសាក្សី ទាក់ទងសំណុំរឿងដែលគេចោទថា លោកស្នេហាលួចលាក់។
ការប្ដឹងឧទ្ធរណ៍នេះ ធ្វើឡើងបន្ទាប់ពី ចៅក្រមជម្រះក្តីនៃសាលាដំបូងរាជធានីភ្នំពេញលោក កែវ មុនី កាលពីថ្ងៃទី៩ ខែកញ្ញា ឆ្នាំ២០១៦ បានប្រកាសសាលក្រមផ្តន្ទាទោស លោក កឹម សុខា កំបំាងមុខ ដោយដាក់ពន្ធនាគារ៥ខែ និងពិន័យជាប្រាក់៨សែនរៀល។
ក្នុងពាក្យបណ្ដឹងឧទ្ធរណ៍ដែលដាក់ទៅសាលាដំបូងរាជធានីភ្នំពេញ នៅថ្ងៃទី ៥ ខែតុលា ឆ្នាំ២០១៦ ក្រុមមេធាវីការពារក្តីឲ្យលោក កឹម សុខា បានលើកឡើងថា សាលក្រមផ្តន្ទាទោស ដែលប្រកាសកាលពីថ្ងៃទី៩ ខែកញ្ញា ឆ្នាំ២០១៦ ធ្វើឡើងដោយភាពអយុត្តិធម៌ ខណៈដែលកូនក្ដីរបស់ខ្លួននៅមានអភ័យឯកសិទ្ធិតំណាងរាស្ត្រ។