មន្ត្រីកាទូតកូរ៉េខាងជើងម្នាក់ទៀតប្រចាំនៅទីក្រុងប៉េកាំង បានចុះចូលនឹងកូរ៉េខាងត្បូង។ នេះដោយយោងតាមការចុះផ្សាយរបស់ AFP ដោយផ្អែកតាមទីភ្នាក់ងារព័ត៌មានកូរ៉េខាងយ៉ុនហាប់ នៅថ្ងៃពុធនេះ ប៉ុន្តែសេចក្ដីរាយការណ៍មួយទៀតបានផ្សាយថា បុគ្គលិកទូតកូរ៉េខាងជើង ២នាក់ បានស្វែងរកសិទ្ធិជ្រកកោនក្នុងស្ថានបេសកទូតជប៉ុននៅទីក្រុងប៉េកាំង។
ទីភ្នាក់ងារព័ត៌មាន AFP បានបន្តថា ប្រសិនបើជាការពិត វាគឺជាការចុះចូលថ្មីមួយទៀត នៅក្នុងចំណោមមន្ត្រីជាន់ខ្ពស់កូរ៉េខាងជើង ដែលអ្នកតាមដានមួយចំនួនកត់សម្គាល់ថា ជាសញ្ញានៃកំណើនអស្ថិរភាពជាមួយមេដឹកនាំក្រុងព្យុងយ៉ាង។
ទីភ្នាក់ងារព័ត៌មានយ៉ុនហាប់ ដែលបានដកស្រង់ប្រភពអានាមិក បានផ្សាយថា មន្ត្រីរូបនោះ បានបាត់ខ្លួនជាមួយក្រុមគ្រួសាររបស់គាត់កាលពីចុងខែកញ្ញាកន្លងមក។ មន្ត្រីរូបនោះ ត្រូវបានដាក់ឲ្យបំពេញការងារនៅស្ថានទូតកូរ៉េខាងជើងប្រចាំទីក្រុងប៉េកាំង ប៉ុន្តែ ស្ថិតក្រោមក្រសួងសុខាភិបាលកូរ៉េខាងជើង។
ប្រភពដដែលបានបន្តថា មន្ត្រីរូបនោះ ទទួលខុសត្រូវចំពោះការស្វែងរកប្រភពផ្គត់ផ្គង់ផ្នែកវេជ្ជសាស្ត្រដល់គ្លីនិកមួយនៅទីក្រុងព្យុងយ៉ាង ដែលផ្ដល់ការព្យាបាលដល់មេដឹកនាំកូរ៉េខាងជើង លោក គីម ជុងអ៊ុន និងក្រុមគ្រួសាររបស់លោក។
ចំណែកសេចក្ដីរាយការណ៍មួយទៀតរបស់កាសែតកូរ៉េខាងត្បូង JoongAng Ilbo បានផ្សាយថា បុគ្គលិកជាន់ខ្ពស់ ២រូប នៅស្ថានទូតកូរ៉េខាងជើងប្រចាំទីក្រុងប៉េកាំង បានស្នើសុំសិទ្ធិជ្រកកោននៅជប៉ុន។
ប៉ុន្តែ អ្នកនាំពាក្យរដ្ឋាភិបាលជប៉ុន លោក Yoshihide Suga បានបដិសេធថា គ្មានការស្នើសុំណាមួយ ត្រូវបានគេធ្វើឡើងទៅកាន់ស្ថានបេសកទូតជប៉ុននោះឡើយ៕