មេដឹកនាំហ្វីលីពីន លោក រ៉ូទ្រីហ្កូ ឌូទើតេ កាលពីថ្ងៃម្សិលមិញបានប្រាប់ប្រធានាធិបតីអាមេរិកឲ្យទៅ “ចុះនរកចុះ” ហើយថ្លែងថាអាមេរិកបានបដិសេធលក់អាវុធមួយចំនួនដល់ប្រទេសរបស់លោក ប៉ុន្តែលោកមិនខ្វល់នោះឡើយ ដោយសារចិននិងរុស្ស៊ីគឺជាអ្នកលក់អាវុធប្រកបដោយឆន្ទៈ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
Reuters បានបន្តថា លោក ឌូទើតេ កំពុងរៀបចំគោលនយោបាយការបរទេសរបស់លោកជាថ្មី ដោយសារតែគោលនយោបាយរបស់លោកជាមួយសហរដ្ឋអាមេរិកបានបរាជ័យ ហើយលោកបន្ថែមថានៅពេលណាមួយនោះ “ខ្ញុំនឹងចែកផ្លូវជាមួយអាមេរិក”។ តែគេមិនទាន់ដឹងច្បាស់ថា តើលោកចង់មានន័យថាម៉េចនោះទេចំពោះការប្រើពាក្យថា “ចែកផ្លូវ”នេះ។
អំឡុងថ្លែងសុន្ទរកថាវាយប្រហារចំៗនៅទីក្រុងម៉ានីលនោះ លោក ឌូទើតេ បានថ្លែងថា អាមេរិកមិនចង់លក់មីស៊ីលនិងអាវុធដទៃទៀតនោះឡើយ ប៉ុន្តែរុស្ស៊ីនិងចិនបានប្រាប់លោកថា ពួកគេអាចផ្ដល់ឲ្យលោកដោយងាយ៕