អាជ្ញាធរឧតុនិយមកម្ពុជាបានព្រមានអំពីជំនន់ទឹកភ្លៀងនៅតាមបណ្ដាខេត្តចំនួន១០នៅសប្ដាហ៍ក្រោយនេះ។
ក្នុងសេចក្ដីប្រកាសព័ត៌មាននៅព្រឹកថ្ងៃនេះ ក្រសួងធនធានទឹកនិងឧតុនិយមបានឲ្យដឹងថា ប្រទេសកម្ពុជាកំពុងទទួលរងខ្យល់មូសុងនិរតីនិងប្រព័ន្ធសម្ពាធទាបនៅភាគខាងជើងប្រទេស។
ក្រសួងបានបន្ថែមថា ប្រព័ន្ធសម្ពាធទាបនេះនឹងបង្កជាភ្លៀងធ្លាក់ក្នុងកម្រិតពីមធ្យមទៅច្រើន នៅតាមតំបន់វាលទំនាបនិងខ្ពង់រាប ហើយតំបន់មាត់សមុទ្រអាចនឹងមានភ្លៀងធ្លាក់ពីមធ្យមទៅបង្គួរ។
ក្រសួងក៏បានព្រមានទៅដល់ប្រជាពលរដ្ឋនៅតាមបណ្ដាខេត្តភាគឦសាន ភាគខាងជើង និងភាគពាយព្យ ឲ្យប្រុងប្រយ័ត្នចំពោះទឹកជំនន់ដែលបង្កឡើងដោយភ្លៀងធ្លាក់ច្រើនជាប់ៗគ្នា ចាប់ពីថ្ងៃទី៩ដល់ថ្ងៃទី១៣ ខែតុលាខាងមុខនេះ៕
