រដ្ឋសភាបានប្រកាសទទួលស្គាល់លោក សួន រីដា ជំនួសលោក ប៉ែន សុវណ្ណ ដែលបានទទួលមរណភាព។
សេចក្តីប្រកាសព័ត៌មានរបស់អគ្គលេខាធិការដ្ឋាននៃរដ្ឋសភានៅថ្ងៃទី៥ ធ្នូ ២០១៦នេះឲ្យដឹងថា អង្គប្រជុំបានអនុម័តលើសំណើសុំប្រកាសទទួលស្គាល់ លោក សួន រីដា ជាតំណាងរាស្ត្រថ្មី នៃមណ្ឌលកំពង់ស្ពឺ ជំនួស លោក ប៉ែន សុវណ្ណ ដែលទទួលមរណភាព។
សេចក្តីប្រកាសបន្តថា ការប្រកាសសុពលភាពនៃអាណត្តិរបស់ លោក សួន រីដា ជាសមាជិករដ្ឋសភានីតិកាលទី៥ នឹងធ្វើឡើងក្នុងសម័យប្រជុំរដ្ឋសភាពេញអង្គនាថ្ងៃទី៧ ខែធ្នូខាងមុខ។
លោក ប៉ែន សុវណ្ណ ជាអតីតតំណាងរាស្ត្រគណបក្សសង្គ្រោះជាតិនិងធ្លាប់ធ្វើជានាយករដ្ឋមន្ត្រីទីមួយ នៃរបបសាធារណរដ្ឋប្រជាមានិតកម្ពុជា ចន្លោះឆ្នាំ១៩៧៩ដល់ឆ្នាំ១៩៨១ បានទទួលមរណភាពកាលពីថ្ងៃទី២៩ ខែតុលា ឆ្នាំ២០១៦ កន្លងទៅនេះ ដោយរោគាពាធ។ ចំណែក លោក សួន រីដា បច្ចុប្បន្ននេះមានអាយុ៤៤ឆ្នាំ ជាបេក្ខជនជាប់ឆ្នោតតំណាងរាស្ត្រមណ្ឌលខេត្តកំពង់ស្ពឺ៕