មន្ត្រីរដ្ឋាភិបាល គំរាមថា នឹងចាត់វិធានការឃាត់ខ្លួន ជនទាំងឡាយណា ដែលនៅតែបន្តចេញមុខរារាំង មិនឲ្យមនុស្សមួយចំនួន អាចទៅបោះឆ្នោតបាន ដូចការបោះឆ្នោតឆ្នាំ២០១៣ ដោយថាដើម្បីអនុវត្តច្បាប់ ធានាដល់ដំណើរការបោះឆ្នោតឆ្នាំ២០១៧។
កាលពីអាណត្តិទី៥ឆ្នាំ២០១៣ ការិយាល័បោះឆ្នោតមួយនៅស្រុកស្អាង ខេត្តកណ្តាលបាន បិទមុនពេលកំណត់ ដោយសាតែពលរដ្ឋនៅតំបន់នោះ រារាំងមិនឲ្យមនុស្សមួយក្រុមទៀត ដែលពួកស្គាល់ថាជាជនជាតិវៀតណាមខុសច្បាប់ ចូលមកបោះឆ្នោតជ្រើសរើសមេដឹកនាំជំនួសខ្មែរ។
ការិយាល័យបោះឆ្នោតខ្លះទៀត នៅរាជធានីភ្នំពេញ ក៏ត្រូវបានរារាំងដូចគ្នា ដោយសាពួកគេអះអាងថា ជនដែលត្រូវឲ្យបោះឆ្នោតបាននោះ ជាវៀតណាមកាន់អត្តសញ្ញាណប័ណ្ណសញ្ញាតិខ្មែរខុសច្បាប់។
ក្នុងកិច្ចប្រជុំពិគ្រោះយោបល់លើសេចក្តីព្រាងបទបញ្ជា និងនីតិវិធីសម្រាប់បោះឆ្នោតឃុំ សង្កាត់ ឆ្នាំ២០១៧ លោក សោម ចាន់ឌីណា ដែលអះអាងថាជាតំណាងក្រសួងមហាផ្ទៃបាន រំឭក គជប ថា ការបោះឆ្នោតឆ្នាំ២០១៣ជាគំរូស្រាប់ មានមនុស្សមួយក្រុម បានចេញមុខរារាំងមនុស្សមួយចំនួនមិនឲ្យទៅបោះឆ្នោត។
លោក សោម ចាន់ឌីណា បន្តថា ដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ខាងមុននេះ បើមានហេតុការណ៍នេះកើតឡើងម្តងទៀតលោកថា ក្រសួងមហាផ្ទៃ និងក្រសួងការពារជាតិ នឹងចាត់វិធានការតាមកិច្ចព្រមព្រៀង ជាមួយ គជប ដែលបានស្នើសុំកិច្ចសហការរក្សាសណ្តាប់ធ្នាប់អំឡុងពេលបោះឆ្នោត។
លោកថា៖«ក្រសួងមហាផ្ទៃ និងក្រសួងការពារជាតិ ដែលបានសហការជាមួយ គជប ហើយបើមានអំពើរារាំងបែបនេះ។ហើយអំពើរារាំងបែបនេះជៀសមិនផុតទេពីការឃាត់ខ្លួន និងការផាកពិន័យ»។
នៅឆ្នាំ២០១៦រដ្ឋាភិបាល បានបញ្ចូលកម្លាំងប្រដាប់អាវុធ ទៅជាភ្នាក់ងារការពារសណ្តាប់ធ្នាប់ ចាប់ពីការចុះធ្វើបញ្ចីឈ្មោះបោះឆ្នោត រហូតក្រោយបោះឆ្នោតឆ្នាំ២០១៨។
អនុប្រធាន គជប លោក គួយ ប៊ុនរឿន អះអាងថា ការបោះឆ្នោតខាងមុខ លោកថានឹងគ្មានបញ្ហាទាំងនោះកើតឡើងទៀតទេ ដោយថា កាលពីមុននោះបញ្ជីបោះឆ្នោតមានភាពមិនប្រក្រតីច្រើន រឿងជនអន្តោប្រវេសន៍ ។លោកថា ការចុះធ្វើបញ្ជីឈ្មោះបោះឆ្នោតថ្មីនេះ មានតម្លាភាពច្រើន ធ្វើឲ្យពលរដ្ឋជឿបាន។ម្យ៉ាងទៀតលោកថា តំបន់ដែលធ្លាប់ផ្ទុះការតវ៉ានោះក៏មិនសូវមានវត្តជនជាតិបរទេសទាំងនោះនៅក្នុងបញ្ជីបោះឆ្នោតថ្មីនេះដែរ។
លោកថា៖«ពីមុនមកដោយសារបញ្ជីបោះឆ្នោតយើងហ្នឹងមានការចោទប្រកាន់ច្រើន មានទាំងជនបរទេសអញ្ចឹង ។ហើយទិដ្ឋភាពជាក់ស្តែងខ្ញុំនិយាយត្រង់ទៅ កន្លែងដែលធ្លាប់មានបទចោទប្រកាន់ ថាមានជនជាតិបរទេសច្រើន ដែលធ្លាប់ចុះឈ្មោះ ដូចជានៅខេត្តកណ្តាលអី លើកនេះគឺមានចំនួនតិច ។អ្នកបោះឆ្នោតមាន៨ពាន់នាក់អី ឃើញមានតែ២០០២នាក់ទេ។ហើយនៅខេត្តសៀមរាម ដូចជានៅចុងឃ្នាសអីមានចំនួនតិចទេ។ដូច្នេះខ្ញុំយល់ឃើញថាមិនមានបាតុភាពរារាំងមិនឲ្យជនជាតិបរទេសនោះបោះឆ្នោតបានទៀតទេ»។
មន្ត្រីផ្នែកច្បាប់នៅអង្គការឃ្លាំមើលការពោះឆ្នោតខុមហ្វ្រែល ដែលបានចូលរួមកម្មវិធីនោះ គឺលោក យឿង សុធារ៉ា ឲ្យក្រុមអ្នកសារព័ត៌ដឹងក្រោយបិទបញ្ចប់កម្មវិធីថា ដើម្បីកាត់បន្ថយបញ្ហានេះបាន លោកថា ក្រសួងមហាផ្ទៃ ត្រូវបង្ហាញពីតម្លាភាព ដែលអាចឲ្យពលរដ្ឋជឿបាន ពីការចេញឯកសារនានាបញ្ជាក់ពីភាពត្រូវនៃការចូលសញ្ជាតិ ដល់ជនបរទេស ពិសេសការចេញអត្តសញ្ញាណប័ណ្ណសញ្ញាតិខ្មែរ។
លោកថា៖«ដើម្បីជៀសវាងនៅកំហុស និងមន្ទិលសង្ស័យ ក្រសួងមហាផ្ទៃហ្នឹងត្រូវបង្ហាញនូវតម្លាភាពហ្នឹង ត្រូវធ្វើការឲ្យហ្មត់ចត់ មុននឹងចេញអន្តសញ្ញាណប័ណ្ណអីហ្នឹង ត្រូវពិនិត្យឲ្យបានច្បាស់លាស់ ដើម្បីកាត់បន្ថយជម្លោះ និងមន្ទិលសង្ស័យ ។យើងដឹងហើយថា ការចោទប្រកាន់ច្រើន ដោយសារតែអាជ្ញាធរមូលដ្ឋានហ្នឹងចេញឯកសារមួយចំនួនដែលគាត់នៅមិនស្របច្បាប់ផង ចេញេកសារឲ្យ ធ្វើឲ្យមានការរិះគន់ច្រើន ទាក់ទិននឹងអាជ្ញាធរមូលដ្ឋាន»។
ទោះជាយ៉ាងណាមលោក សោម ចាន់ឌីណា ក៏បានរំឭក គជប ផងដែរ ពីភាពមិនប្រក្រតីមួយទៀត ដែលកើតចេញពីទឹកថ្នាំជ្រលក់ដៃលាងជ្រះ សម្រាប់បម្រើឲ្យការបោះឆ្នោត។
ការបោះឆ្នោតឃុំសង្កាត់នឹងប្រព្រឹត្តិទៅនៅថ្ងៃទី៤ខែមិថុនាឆ្នាំ២០១៧នេះ ដែលមានអ្នកទៅចុះឈ្មោះបោះឆ្នោតជាង៧លាន៨សែននាក់ ស្មើជាង៨១ភាគរយនៃចំនួនពលរដ្ឋដែលមានអាយុគ្រប់បោះឆ្នោតជាង៩លាន៦សែននាក់។
