ក្រុមការងារសាងសង់ស្ពានឆ្លងកាត់ផ្លូវឬហៅស្ពានអាកាសផ្សារដីហុយ គ្រោងនឹងបញ្ចប់ការសាងសង់នៅត្រឹមខែធ្នូឆ្នាំ២០១៧ ដើម្បីបើកឲ្យសាធារណជនធ្វើដំណើរបានធម្មតា អាចជួយសម្រួលការកកស្ទះចរាចរណ៍ ខណៈបច្ចុប្បន្នស្ពាននេះទើបសាងសង់បានប្រមាណ៣០%។
បើតាមហ្វេសប៊ុករបស់លោកនាយករដ្ឋមន្ត្រី ហ៊ុន សែន សរសេរនៅថ្ងៃនេះថា ស្ពាននៅស្តុបផ្សារដីហុយមានប្រវែង៩០៥ម៉ែត្រនិងទទឹង១៦,៥ម៉ែត្រ ហើយស្ពាននេះគ្រោងបញ្ចប់នៅខែធ្នូឆ្នាំ២០១៧។
ហ្វេសប៊ុករបស់លោក ហ៊ុន សែន ឲ្យដឹងទៀតថា ថវិកាសម្រាប់សាងសង់ស្ពាននេះ គឺបានកម្ចីពីរដ្ឋាភិបាលនៃប្រទេសចិន។ លោកសរសេរថា៖ «គម្រោងស្ពានអាកាសស្តុបផ្សារដីហុយនិងផ្លូវក្រវ៉ាត់ក្រុងទី២ គឺជាគម្រោងហិរញ្ញប្បទានរបស់សាធារណរដ្ឋប្រជាមានិតចិន ហើយស្ពាននេះស្ថិតនៅលើដងផ្លូវសហព័ន្ធរុស្សី ដែលប្រសព្វជាមួយផ្លូវលេខ១០១៩ (ស្តុបផ្សារដីហុយ)។ ស្ពានអាកាសទី៥ក្នុងរាជធានីភ្នំពេញនេះ គឺនឹងជួយសម្រួលដល់បញ្ហាកកស្ទះចរាចរណ៍នៅតំបន់ជុំវិញទីនេះបានយ៉ាងច្រើន ហើយនឹងធ្វើអោយការធ្វើដំណើររបស់ប្រជាពលរដ្ឋកាន់តែងាយស្រួលជាងមុន»។
លោកនាយករដ្ឋមន្ត្រី ហ៊ុន សែន ក៏អំពាវនាវសុំឲ្យប្រជាពលរដ្ឋមានការយោគយល់និងអធ្យាស្រ័យ ដោយសារក្នុងអំឡុងពេលសាងសង់នេះ មានការកកស្ទះការធ្វើចរាចរណ៍៕