អង្គការសុខភាពពិភពលោករកឃើញថា ឡាវជាប្រទេសមួយក្នុងចំណោមប្រទេសចំនួន៤១ផ្សេងទៀតនៅលើពិភពលោក ដែលមានឆ្លងរាលដាលមេរោគ Zika នៅក្នុងដើមឆ្នាំ២០១៦ នេះ។
របាយការណ៍អង្គការសុខភាពពិភពលោកបង្ហាញថា នៅពេលថ្មីៗនេះ មានការឆ្លងមេរោគZika នៅប្រទេសឡាវដែលចម្លងតាមរយៈមូសខាំហើយវាអាចបង្កគ្រោះថ្នាក់ដល់ទារកនៅក្នុងផ្ទៃ។ នេះបើតាមសារព័ត៌មានChannel News Asia។
មន្ត្រីសុខាភិបាលរបស់ឡាវឲ្យដឹងថា ករណីឆ្លងនោះកើតមានលើមនុស្សអាយុ ២២ឆ្នាំ កាលពីខែមុនហើយគេទទួលការព្យាបាលនៅក្នុងស្រុកបានជាវិញហើយ។
តំបន់អាស៊ីគេមិនសូវឃើញមានមេរោគប្រភេទនេះ ចោទជាបញ្ហាធ្ងន់ធ្ងរទេ តែនៅអាមេរិកឡាទីនរហូតដល់មានការប្រកាសអាសន្នពីអង្គការសុខភាពពិភពលោក។
ប្រទេសប្រេស៊ីល ជាប្រទេសដែលបានប្រកាសអាសន្នមុនគេចំពោះមេរោគ Zika ដែលតាំងពីរាលដាលការឆ្លងមកមនុស្សប្រមាណ១លាន៥សែនជួបបញ្ហាប្រឈម ហើយក្នុងនោះមាន៦៤១នាក់ បញ្ជាក់ថា មានការឆ្លង៕
