ក្រសួងសាធារណៈការ និងដឹកជញ្ជូន បានចេញសេចក្ដីជូនដំណឹងពីការបង្កើតក្រុមការងារខ្សែទូរស័ព្ទពិសេស (Hotline) ដើម្បីទទួល និង ផ្ដល់ព័ត៌មានដល់សាធារណៈជន លើបញ្ហាផ្សេងៗជុំវិញ កិច្ចការងារដឹកជញ្ជូន។
សេចក្ដីជូនដំណឹងចុះថ្ងៃទី ៣ ខែ មីនា បានឲ្យដឹងថា អគ្គនាយកដ្ឋានដឹកជញ្ជូននៃក្រសួងសាធារណៈការបានរៀបចំបង្កើតក្រុមការងារខ្សែទូរស័ព្ទពិសេស (Hotline) សម្រាប់ទទួល និង ផ្ដល់ព័ត៌មានដល់សាធារណៈជន ដើម្បីជួយសម្រួលដោះស្រាយបញ្ហា និងចម្ងល់ផ្សេងៗទាក់ទងនឹងវិស័យសាធារណៈលើវិស័យដឹកជញ្ជូន។
សេចក្ដីជូនដំណឹងដដែលឲ្យដឹងថា ថ្នាក់ដឹកនាំ និងមន្ត្រីជំនាញបច្ចេកទេសថ្នាក់អនុប្រធាននាយកដ្ឋាន របស់អគ្គនាយកដ្ឋានដឹកជញ្ជូន រង់ចាំពិភាក្សា និង បកស្រាយដោយផ្ទាល់រៀងរាល់ម៉ោងធ្វើការតាមរយៈទូរសព្ទដូចជា ០១២ ៨៤៤ ០៩៨/ ០១៧ ៧២០ ៥៥៧/ ០១២ ៦៨៦ ៨៤៩ និង០១២ ៨៩៧ ៥២៣។
ថ្មីៗនេះ លោកនាយករដ្ឋមន្ត្រីហ៊ុន សែន ក៏បានលើកឡើងរិះគន់ចំៗ ថាក្រសួងសាធារណៈការ ស្ថិតនៅក្នុងលំដាប់ថ្នាក់ទាបជាងគេបង្អស់ក្នុងការបម្រើសេវាសាធារណៈជូនដល់ប្រជាពលរដ្ឋ។ ដោយលោកលើកឡើងថា ក្រសួងដែលមានបញ្ហា និង ធ្វើការយឹតយ៉ាវជាងគេនោះ គឺក្រសួងសាធារណៈ និង ដឹកជញ្ជូននេះឯង៕