អង្គការតំបន់មួយបានបង្ហាញក្តីបារម្ភពីការបន្តឃុំខ្លួនអតីតអ្នកយកព័តមានអាស៊ីសេរី ដោយអំពាវនាវឲ្យរដ្ឋាភិបាលទម្លាក់ការចោទប្រកាន់ និងដោះលែងអ្នកទាំងពីរជាបន្ទាន់។
កាលពីថ្ងៃទី៤ មេសា សាលាឧទ្ធរណ៍បានសម្រចទាត់ចោលបណ្តឹងសុំមោឃភាពនីតិវិធី នៃការឃាត់ខ្លួនបស់មេធាវីរបស់អតីតអ្នកការសែតអាស៊ីសេរីលោក អ៊ូន ឈិន និងលោកយាង សុជាមេត្តា ដោយថានគរបាលមិនបានឃុំខ្លួនអ្នកទាំងពីរហួសការកំណត់នោះទេ។
ក្នុងសេចក្តីប្រកាសព័ត៌មានចុះថ្ងៃទី ៥ មេសា ឆ្នាំ២០១៨ វេទិការអាស៊ាន ដើម្បិសិទ្ធិមនុស្ស និងការអភិវឌ្ឍ ដែលមានទីតាំងនៅទីក្រុងបាងកកប្រទេសថៃ ថាសម្រេចនេះគឺជាការវិនិច្ឆ័យមិនយុត្តិធម៌ និងមានចេតនាធ្វើទុក្ខបុកម្នេញសេរីភាពសារព័ត៌មាននៅកម្ពុជា និងបានចាត់ទុកករណីរបស់ពួកគេគឺជាឧទាហរណ៍មួយទៀតនៃការធ្វើឱ្យខូចខាតសិទ្ធិមនុស្សនៅកម្ពុជាជាពិសេសសិទ្ធិសេរីភាពបញ្ចេញមតិស្របតាមការផ្តល់សច្ចាប័នលើកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ។
វេទិការអាស៊ានសរសេរថា៖ « ប្រសិនបើរដ្ឋាភិបាលកម្ពុជាចង់បង្ហាញពីចេតនារបស់ខ្លួនក្នុងការជំរុញប្រទេសឱ្យឆ្ពោះទៅរកការបោះឆ្នោតសេរី និងយុត្តិធម៌នោះវាគួរតែធានាឱ្យមានការជំនុំជម្រះដោយយុត្តិធម៌មួយទៅលើករណីរបស់អួន ឈិន និងយៀង សុធារិន » ។
មាត្រា ៩៦ នៃក្រមនីតិវិធីព្រហ្មទណ្ឌ ស្ដីពីការឃាត់ខ្លួនចែងថា មន្ត្រីនគរបាលយុត្តិធម៌អាចឃាត់ខ្លួនជនសង្ស័យបាន ៤៨ម៉ោង។ ថិរវេលានេះត្រូវគិតចាប់ពីម៉ោងដែលសាមីខ្លួនមកដល់អង្គភាពនគរបាល ឬកងរាជអាវុធហត្ថ។
ក្នុងការអនុវត្តន៍ច្បាប់ ប្រសិនជាតុលាការរកឃើញតាមអ្នកអនុវត្តន៍មានកំហុសនីតិវិធីនោះ តុលាការត្រូវដោះលែងជនសង្ស័យឲ្យមានសេរីភាពវិញ។
អ្នកនាំពាក្យក្រសួងយុត្តិធម៌លោក ជិន ម៉ាលីន ថាការលើកឡើងនេះគឺជាការលើកឡើងដដែលៗ និងមានចេតនានយោបាយច្រើនជាងបច្ចេកទេស។
លោកថា៖ « បានន័យថាឲ្យតែអនុវត្តន៍ច្បាប់ទៅលើសកម្មជនសិទ្ធិមនុស្ស ឬក៏ក្រុមបក្សប្រឆាំងគាត់ថាអាហ្នឹងជាការរឹតត្បិតសិទ្ធិសេរីភាពក៏ប៉ុន្តែគាត់អត់វិភាគទៅលើបច្ចេកទេសច្បាប់ និងក្របខ័ណ្ឌច្បាប់ទេ ថាតើទិដ្ឋភាពទាំងអស់ហ្នឹង មានមូលដ្ឋានគ្រប់គ្រាន់បង្កើតជាបទល្មើសដែរឬអត់ទេ។ ជារួមយើងអត់មានចម្លែកទេព្រោះវាជាការឆ្លើយតប និងទិតៀនជាប្រព័ន្ធហើយដែលមួយក្រុមហ្នឹងគេរៀបចំ ធ្វើតែអញ្ចឹង » ។
កាលពីដើមខែកុម្ភៈឆ្នាំ២០១៨ ក្រុមអ្នកសារព័ត៌មានបាននាំគ្នាធ្វើយុទ្ធនាការតាមអនឡាញ ដើម្បីទាមទារឲ្យតុលាការ ពិចារណាទម្លាក់បទចោទប្រកាន់លើអតីតអ្នកយកព័ត៌មានវិទ្យុអាស៊ីសេរី (RFA) ពីររូប ដោយពួកគេយល់ថា ការចោទប្រកាន់ទាក់ទងនឹងការផ្តល់ព័ត៌មានដែលនាំអន្តរាយដល់ ប្រទេសជាតិនេះជាការចោទប្រកាន់មួយធ្ងន់ធ្ងរពេក។
អតីតអ្នកយកព័ត៌មានវិទ្យុអាស៊ីសេរី លោក អួន ឈិន និងលោក យាង សុជាមេត្តា ត្រូវបានសមត្ថកិច្ចចាប់ខ្លួននៅក្នុងផ្ទះសំណាក់មួយនៅក្នុងខណ្ឌមានជ័យ ដោយសមត្ថកិច្ចចោទថា បានលួចផលិតព័ត៌មានពីប្រទេសកម្ពុជា ផ្ញើរទៅឲ្យវិទ្យុអាស៊ីសេរី នៅសហរដ្ឋអាមេរិក។
ការចាប់ខ្លួននិងឃុំខ្លួនអតីតបុគ្គលិកទាំងពីររូបនេះ កើតឡើងបន្ទាប់ពីវិទ្យុអាស៊ីសេរី បានបិទការិយាល័យរបស់ខ្លួននៅកម្ពុជា កាលឆ្នាំមុន បន្ទាប់ពីមានបញ្ហាប្រឈមមួយចំនួនជាមួយរដ្ឋាភិបាល។ ក្រោយការបិទការិល័យនេះ ក្រសួងព័ត៌មានកម្ពុជាបានប្រកាសចាត់វិធានការ បើសិនជាបុគ្គលិកអាស៊ីសេរីនៅតែបន្តចុះយកព័ត៌មានទៀតនោះ៕