អនុរដ្ឋមន្ត្រីម្នាក់និងសមាជិកសភាម្នាក់ទៀតរបស់ម៉ាឡេស៊ីកំពុងបាត់ខ្លួននៅរដ្ឋ Sarawak បន្ទាប់ពីឧទ្ធម្ភាគចក្រដឹកអ្នកទាំងពីរកាត់ផ្ដាច់ទំនាក់ទំនងនៅអំឡុងពេលធ្វើដំណើរពីតំបន់ Betong ទៅតំបន់ Kuching។
សារព័ត៌មាន Channel News Asia បានរាយការណ៍ថា ក្រុមអាជ្ញាធរម៉ាឡេស៊ីកំពុងធ្វើប្រតិបត្តិការមួយដើម្បីស្វែងរកនិងជួយសង្គ្រោះមនុស្ស៦នាក់ ក្នុងនោះមានទាំងអនុរដ្ឋមន្ត្រីម្នាក់និងសមាជិកសភាម្នាក់ផងដែរ ដែលកំពុងបាត់ខ្លួនបន្ទាប់ពីឧទ្ធម្ភាគចក្រដឹកពួកគេបាត់ការទាក់ទងនៅរដ្ឋ Sarawak ។
លោកស្រី Noriah Kasnon អនុរដ្ឋមន្ត្រីនៃក្រសួងឧស្សាហកម្មនិងទំនិញប្រើប្រាស់ បានធ្វើដំណើរតាមឧទ្ធម្ភាគចក្រមួយចាកចេញតំបន់ Betong ជាមួយស្វាមីរបស់គាត់គឺលោក Asmuni Abdullah សមាជិកសភា និងមនុស្ស ៤នាក់ផ្សេងទៀត។
យោងតាមស្នងការនគរបាលរដ្ឋ Sarawak លោក Mohamad Sabtu Osman បានឲ្យដឹងថាឧទ្ធម្ភាគចក្រនោះ បានចេញដំណើរនៅម៉ោង៤រសៀលជាង ហើយបានបាត់ការទាក់ទងនៅម៉ោង៤និង៣២នាទីរសៀលនោះ។ ការធ្វើដំណើរពី Betong ទៅ Kuching ចំណាយពេលប្រហែល៣៥នាទីទៅ៤៥នាទី។
មនុស្សប្រហែល១០០នាក់បានចូលរួមនៅក្នុងប្រតិបត្តិការស្វែងរកនិងជួយសង្គ្រោះ ក្នុងនេះកងទ័ពជើងទឹកបានចាប់ផ្ដើមនៅម៉ោង៦ព្រឹកថ្ងៃសុក្រនេះ។
កាលពីយប់ថ្ងៃព្រហស្បតិ៍ម្សិលមិញ លោកនាយករដ្ឋមន្ត្រីម៉ាឡេស៊ី Najib Razak បាននិយាយថា លោកមានក្ដីបារម្ភយ៉ាងខ្លាំងចំពោះហេតុការណ៍នេះ។ លោកបានបង្ហោះក្ដីបារម្ភរបស់លោកនៅលើបណ្ដាញសង្គម Twitter ថា ការស្វែងរកនិងការជួយសង្គ្រោះកំពុងដំណើរការ ហើយលោកបួងសួងឲ្យមនុស្សទាំងអស់នោះមានសុវត្ថិភាព។
គេពុំបានដឹងច្បាស់លាស់អំពីគោលបំណងនៃការធ្វើដំណើរនេះទេ ប៉ុន្តែរយៈពេលនេះស្ថិតនៅក្នុងដំណាក់កាលឃោសនាបោះឆ្នោតនៅរដ្ឋ Sarawak នៅថ្ងៃស្អែកនេះ៕
ប្រភព៖ Channel News Asia