អគ្គិភ័យនៅជិតទីក្រុងឡូសអែនជឺឡែស បានជំរុញឲ្យមនុស្ស៥ពាន់នាក់ចាកចេញពីផ្ទះសម្បែងរបស់ពួកគេនៅចុងសប្ដាហ៍កន្លងមកនេះនៅតំបន់ Calabasas ដែលជាជាយក្រុងសម្បូរបុគ្គលល្បីរស់នៅក្នុងនោះមានទាំងគ្រួសារតារាសម្ដែងនាង Kardashian ផងដែរ។
ទីភ្នាក់ងារព័ត៌មាន AFP បានរាយការណ៍ថាភ្លើងឆេះព្រៃដែលបានចាប់ផ្ដើមឆេះកាលពីរសៀលថ្ងៃអាទិត្យម្សិលមិញនោះ បានឆេះព្រៃឈើអស់ជិត២០០ហិចតាហើយ ហើយក្រុមពន្លត់អគ្គិភ័យបាននិយាយនៅថ្ងៃនេះថា ពួកគេគ្រប់គ្រងបានត្រឹម៣០ភាគរយប៉ុណ្ណោះ។
ផ្ទះ២ខ្នងបានរងការខូចខាត ហើយអគារពាណិជ្ជកម្មមួយបានរងការបំផ្លិចបំផ្លាញ។
ពុំទាន់មានសេចក្ដីរាយការណ៍ពីជនស៊ីវិលរងគ្រោះនោះឡើយ ប៉ុន្តែអ្នកពន្លត់អគ្គិភ័យ២នាក់បានរងរបួសបន្តិចបន្តួច ហើយអ្នកពន្លត់អគ្គិភ័យម្នាក់ទៀតមានបញ្ហាបេះដូង។
អាជ្ញាធរបានអនុញ្ញាតឲ្យប្រជាជន៥ពាន់នាក់ដែលជម្លៀសចេញនោះវិលត្រឡប់ទៅផ្ទះសម្បែងវិញ ប៉ុន្តែកម្ដៅ ៣០សង្សាររួមទាំងខ្យល់បក់ផងនោះកំពុងគំរាមកំហែងដល់សហគមន៍ Topanga Canyon ស្ថិតនៅខាងជើងទីក្រុងឡូសអែនជឺឡែស។ ពលរដ្ឋរស់នៅទីនោះស្ថិតនៅក្រោមបញ្ជាជម្លៀសចេញនៅឡើយ។
មន្ត្រីពន្លត់អគ្គិភ័យនៅទីក្រុងឡូសអែនជឺឡែសបាននិយយថាភ្លើងឆេះព្រៃនេះកើតឡើងនៅផ្នែកម្ខាងនៃភ្នំមួយ ដែលធ្វើឲ្យក្រុមអ្នកពន្លត់អគ្គិភ័យពិបាកចូលទៅបង្ក្រាប៕