តុលាការមួយនៅក្នុងប្រទេសថៃកាលពីថ្ងៃអង្គារម្សិលមិញ បានបញ្ជាឲ្យដោះលែង និស្សិត៧នាក់ ដែលសមត្ថកិច្ចចាប់ខ្លួនពាក់ព័ន្ធនិងការចែកខិតប័ណ្ណ អំពាវនាវដល់ពលរដ្ឋ កុំឲ្យបោះឆ្នោតគាំទ្ររដ្ឋធម្មនុញ្ញថ្មីដែលព្រាងដោយពួកយោធា។
តុលាការយោធានៅក្នុងទីក្រុងបាងកក បានបញ្ជាឲ្យដោះលែងពួកគេ បន្ទាប់ពីនគរ បាលបានបំពេញការស៊ើបអង្កេតលើការតវ៉ាកាលពីថ្ងៃទី២៣ខែមិថុនា។ ប៉ុន្តែតុលាការ បញ្ជាក់ ថា អ្នកទាំង៧នាក់នេះនៅប្រឈមនិងបទចោទផ្សេងៗទៀត។ នេះ បើតាមសារព័ត៌មាន Mail Online។
នៅថ្ងៃទី៧ខែសីហាខាងមុខនេះ រដ្ឋាភិបាលយោធាថៃដែលឡើងកាន់អំណាចដោយធ្វើរដ្ឋ ប្រហារកាលពីខែឧសភា ឆ្នាំ២០១៤នឹង ឲ្យប្រជាពលរដ្ឋបោះឆ្នោតធ្វើប្រជាមតិ លើសេចក្តី ព្រាងរដ្ឋធម្មនុញ្ញថ្មី។ សម្រាប់ក្រុមអ្នករិះគន់លើកឡើងថា សេចក្តីព្រាងនេះ មិនធ្វើឲ្យសង្គម មានលទ្ធិប្រជាធិបតេយ្យទេ ប៉ុន្តែក្រុមអ្នកដែលហ៊ានចេញមុខតវ៉ាប្រឈមការរិតត្បិតយ៉ាងខ្លាំង ហើយអាចប្រឈមនិងបញ្ជូនទៅកាន់ពន្ធនាគារនិងជាប់ឃុំ១០ឆ្នាំ។
បើទោះបីជាមានការគំរាមកំហែង ក៏ដោយ នៅប៉ុន្មានសប្តាហ៍នេះ ក្រុមអ្នកប្រឆាំង ចេញមុខតវ៉ាជាបន្តបន្ទាប់ ទន្ទឹមនឹងនោះពួកគេប្រកាសគាំទ្ររដ្ឋាភិបាលស៊ីវិលដែលត្រូវបាន បណ្តេញចេញពីតំណែង។ រដ្ឋាភិបាលយោធា បច្ចុប្បន្នបានចេញវិធានការច្រើន សម្រាប់ ប្រើលើអ្នករិះគន់ ប៉ុន្តែពេលនេះនៅមិនទាន់មានសកម្មភាពធំដុំនៅឡើយទេ។
សម្រាប់និស្សិតទាំង៧នាក់នោះ ត្រូវដោះលែងឲ្យនៅក្រៅឃុំ បណ្តោះអាសន្ន នៅថ្ងៃ ពុធនេះ ប៉ុន្តែពួកគេត្រូវទៅបង្ហាញខ្លួននៅមុខតុលាការចំនួន១២ថ្ងៃម្តង។