អ្នកនយោបាយជើងចាស់មួយរូបបាន លើកឡើថាលោកចង់ឲ្យសមាជិករដ្ឋសភាបង្កើតច្បាប់មួយការពារនាយករដ្ឋមន្រ្តីពេលធ្លាក់ពីអំណាច ដើម្បីកុំឲ្យមានការកាត់ទោស។
លោក លឺ ឡាយស្រេង បានលើកឡើងដូចនេះទៅកាន់អ្នកសារព័ត៌មាន ខណៈលោកចូលរួមពិធីរំឭកវិញ្ញាណក្ខន្ធជនរងគ្រោះក្នុងព្រឹត្តិការណ៍បង្ហូរឈាមថ្ងៃ៥-៦កក្កដាឆ្នាំ១៩៩៧ខួបទី២០ឆ្នាំ។ លោកបានអះអាងថាលោកមិនចូលរួមជាមួយគណបក្សសង្រ្គោះជាតិនោះទេ ប៉ុន្តែលោកថាលោកគាំទ្រគណបក្សប្រឆាំងមួយនេះ។
អតីតរដ្ឋមន្រ្តីក្រសួងព័ត៌មាននិងក្រសួងអភិវឌ្ឍជនបទ មកពីគណបក្សហ្វ៊ុនស៊ិនប៉ិចរូបនេះ បានបង្ហាញជំហរបស់លោកថា លោកចង់ឲ្យគណបក្សប្រជាជនកម្ពុជា និងគណបក្សសង្រ្គោះជាតិ សហការគ្នាបង្កើតច្បាប់មួយការពារនាយករដ្ឋមន្រ្តីធ្លាក់ពីអំណាចកុំឲ្យមានការកាត់ទោស។ លោកបន្ថែមថា «ស្នើរសុំឲ្យគណបក្សទាំងពីរធ្វើច្បាប់មួយនៅក្នុងសភា បង្កើតថា នាយករដ្ឋមន្រ្តីផុតអាណត្តិមានអភ័យឯកសិទ្ធិ អត់មានកាត់ទោសទេ រួចហើយឲ្យទៅជាវីរបុរសជាតិ។ ខ្ញុំនិយាយចុះឡើងៗ គេមានតែលោកតាឯងធ្វើទៅស្នើទៅបានល្អ អ្នកផ្សេងស្នើក៏ល្អដែរ ហើយខ្ញុំសូមប្រកាសម្តងទៀត ខ្ញុំអត់ចូលសង្គ្រោះជាតិទេណា តែខ្ញុំគាំទ្រ»។
លោក លឺ ឡាយស្រេង យល់ថា បើធ្វើដូចនេះបានគឺអាចបញ្ជៀសមិនមានវប្បធម៌ «ទឹកឡើងត្រីស្រមោច ទឹកហោចស្រមោចស៊ីត្រី»។
អ្នកនយោបាយអាយុជាង៨០ឆ្នាំរូបនេះ បានព្រមានថា លោក ហ៊ុន សែន កុំគំរាមប្រើកងទ័ពដើម្បីការពារអំណាចរបស់ខ្លួន ដោយថាកងទ័ព៧០% មិនចេញទៅធ្វើសង្រ្គាមជាមួយខ្មែរគ្នាឯងនោះទេ។ លោកបន្ថែមថា « ហើយចង់កាណុង ហើយខ្ញុំផ្តាំហើយណា តិចលោគំរាមកំហែងប្រើចុងកាណុងបរាជ័យហើយ ហ៊ានប្រើអាងអញ់មានទាហាន អត់ទេ! ទាហាន៧០% អត់គាំទ្រទេណា។ កាលពីសានត្រានបញ្ជូនកូនទៅបរទេស ទិញផ្ទះនៅបរទេស ផ្ទះ ឡាន នៅភ្នំពេញរាប់មិនអស់ ប្រពន្ធទាហានវាបង់ចេកចៀនឲ្យកូនទៅរៀន ទាហានមួយចំនួនរត់ម៉ូតូ ឌុបតិចដល់តែចាញ់ហើយហៅវាមកច្បាំងបង្ហូរឈាមខ្មែរតិចវាមិនទៅ។ ៧០%អត់ទៅ ដូច្នេះទូងៗកុំលេងហាបរាជ័យ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកមិនទាន់នឹកឃើញពីបញ្ហានេះទេ ហើយថាមិនស្របតាមសភាពការណ៍ជាក់ស្តែងទេ «ឥឡូវបញ្ហាសំខាន់យើងអនុវត្តត្រឹមត្រូវតាមគោលការណ៍ច្បាប់ ដូច្នេះយើងគ្មានព្រួយបារម្ភពីបញ្ហាអ្នកណាកាត់ទោសអ្នកណាទេ អត់មានបញ្ហាអញ្ចឹងទេ! បើកាលណាយើងបង្កើតរឿងហ្នឹង វាហាក់ដូចជាយើងមានខ្លួន អញ្ចឹងទេ! លឺ ឡាយស្រង និយាយនេះ គាត់វង្វេងគាត់ទេ!»។
លោកបន្ថែមថា កងទ័ពមិនស្រឡាញ់សង្គ្រាមទេ តែចាំបាច់គេត្រូវបង្ក្រាបដើម្បីការពារសន្តិភាព។
សូមរំឭកថា បំណងនៃការបង្កើតច្បាប់ការពារនាយករដ្ឋមន្រ្តីដែលធ្លាក់ពីអំណាចនេះត្រូវបាន លោក ហ៊ុន សែន បង្ហើបម្តងដែរកាលពីពេលស្រុះស្រួលផ្នែកនយោបាយក្រោយជាប់គាំងឆ្នាំ២០១៤។ ប៉ុន្តែលោកអះអាងថា ច្បាប់នេះត្រូវបានលើកឡើងដោយគណបក្សប្រឆាំង តែលោកអះអាងថាលោកមិនត្រូវការច្បាប់នេះទេ៕
រាយការណ៍បន្ថែមដោយ ហួត វុទ្ធី
