អង្គការសង្គមស៊ីវិលមួយ បានរកឃើញថា ករណីវិវាទដីធ្លីថ្មីដែលកើតឡើងក្នុងឆ្នាំ២០១៦ មានចំនួន៥៦ករណីហើយថាកើនឡើងជាងឆ្នាំនានាដែលគេបានធ្វើការកត់ត្រាតាំងពីឆ្នាំ២០០៧មកនោះ។
ក្នុងរបាយការណ៍ដែលបង្ហាញដោយវេទិកានៃអង្គការមិនមែនរដ្ឋាភិបាលស្តីពីកម្ពុជានៅថ្ងៃនេះ ឲ្យដឹងថា ក្នុងឆ្នាំ២០១៥ ជម្លោះដីធ្លីដែលខ្លួនបានរកឃើញមានចំនួន២៣ករណី ប៉ុន្តែក្នុងឆ្នាំ២០១៦នេះ មានការកើនឡើងទ្វេរដង។ ប៉ុន្តែបើធ្វើការប្រៀបធៀបករណីវិវាទកើតថ្មីក្នុងឆ្នាំ២០១២ ជាឆ្នាំបោះឆ្នោតជ្រើសរើសឃុំសង្កាត់ ចំនួនវិវាទដីធ្លីក៏មានការកើនឡើងខ្ពស់ផងដែរ ដោយមានចំនួន៤៦ករណី ចំនួននេះធៀបនឹងឆ្នាំ២០១៦ មានចំនួន៥៦ករណី គឺកើនឡើងច្រើនជាង១៨%។
របាយការណ៍ដដែលកត់សំគាល់ថា វិវាទដីធ្លី៥៨ករណី បានដោះស្រាយចប់ទាំងស្រុងនៅក្នុងឆ្នាំ២០១៦ ប៉ុន្តែ៣ករណីបានបោះបង់ការទាមទារ ដោយសាអាជ្ញាធរឃុំបានប្តឹងតំណាងប្រជាពលរដ្ឋទៅតុលាការ ហើយតុលារការបានកោះហៅតំណាងទៅបំភ្លឺ ដោយចោទថាប្រជាពលរដ្ឋបានរំលោភយកដីសាធារណៈរបស់រដ្ឋ។ ករណីខ្លះទៀត ពលរដ្ឋជាដើមបណ្តឹងធ្លាប់ត្រូវអាជ្ញាធរបាញ់គំរាមកំហែង បានធ្វើចំណាកស្រុកទៅក្រៅខេត្ត លែងមានអ្នកណាចេញមុខក្នុងការប្តឹងទាមទារ។
បើតាមរបាយការណ៍នេះ នៅមានវិវាទដីធ្លី៣១៩ករណី ដែលពុំទាន់ និងកំពុងរងចាំការដំណោះស្រាយ ហើយថា ខេត្តរតនគិរី មានវិវាទច្រើនជាងគេ គឺ៣១ករណី បន្ទាប់មកគឺរាជធានីភ្នំពេញ។ វិវាទដីធ្លី៣១៩ករណីនេះ បានប៉ះពាល់ដល់ប្រជាពលរដ្ឋចំនួន៥៤,៥០៧.០០គ្រួសារ បានគ្រប់ដណ្តប់លើផ្ទៃដីទំហំ១,០៥២,៩៣៥.៩១ហិកតា។
វេទិកានៃអង្គការមិនមែនរដ្ឋាភិបាលស្តីពីកម្ពុជារកឃើញថា មូលហេតុដែលបង្កឲ្យមានវិវាទដីធ្លី គឺ ការផ្តល់ដីសម្បទានដីសេដ្ឋកិច្ចនាពេលកន្លងមក ការប្រើប្រាស់អំណាចជាមន្ត្រីរាជការ កងកម្លាំងប្រដាប់អាវុធ និងអំណាចមុខងារជាឧកញ៉ាឬអ្នកមាន និងការរំលោភយកដីរដ្ឋធ្វើជាកម្មសិទ្ធិ៕