ទីភ្នាក់ងារព័ត៌មាន AFP បានរាយការណ៍ថា មនុស្សយ៉ាងតិច ១៣នាក់ ស្លាប់ ហើយ ៦នាក់ទៀត បានរងរបួស នៅក្នុងគ្រោះថ្នាក់អគ្គិភ័យនៅក្នុងបារមួយកន្លែង នៅព្រឹកព្រលឹមថ្ងៃសៅរ៍នេះ នៅភាគខាងជើងទីក្រុង Rouen។
AFP បានដកស្រង់សម្ដីមន្ត្រីប៉ូលិស ដែលបាននិយាយថា គ្រោះថ្នាក់អគ្គិភ័យនេះ បណ្ដាលមកពីភ្លើងទាននៃនំខួបកំណើត ដែលបានឆាបឆេះពិដានខាងលើនៃបន្ទប់ក្នុងបារនោះ។
ជនរងគ្រោះ ដែលមានអាយុចន្លោះពី ១៨ ដល់ ២៥ឆ្នាំ បានថប់ដង្ហើមស្លាប់ដោយសារតែឧស្ម័នពុលកើតចេញពីជ័រប្លាស្ទីក។ ជនរងរបួសម្នាក់ កំពុងស្ថិតក្នុងដំណាក់កាលសង្គ្រោះជីវិតនៅឡើយ។
អាជ្ញាធរបារាំងបញ្ជាក់ថា នោះមិនមែនជាការបំផ្ទុះគ្រាប់បែកនោះឡើយ ប៉ុន្តែ វាគឺជាគ្រោះថ្នាក់ដ៏អាក្រក់បំផុតចាប់តាំងពីខែកញ្ញា ឆ្នាំ២០០៥ នៅពេលអគ្គិភ័យមួយបានឆាបឆេះលើអគារអាផាតាមិនមួយកន្លែងនៅទីក្រុងប៉ារីស ដោយបានសម្លាប់មនុស្ស ១៨នាក់៕