ក្រសួងសេដ្ឋកិច្ចនិងហិរញ្ញវត្ថុកាលពីថ្ងៃម្សិលមិញ បានក្រើនរំលឹកដល់ម្ចាស់អចលនទ្រព្យទាំងអស់និងម្ចាស់ យានយន្តគ្មានពន្ធនិងរថយន្តចង្កូតស្ដាំ បង់ពន្ធជូនរដ្ឋឲ្យបានមុនថ្ងៃផុតកំណត់។
ក្នុងសេចក្ដីប្រកាសព័ត៌មានចេញផ្សាយកាលពីថ្ងៃម្សិលមិញ អគ្គនាយកដ្ឋានពន្ធដារបានប្រកាសថាម្ចាស់អច លនទ្រព្យមួយចំនួននៅមិនទាន់បំពេញកាតព្វកិច្ចបង់ពន្ធនៅឡើយទេ។
អគ្គនាយកដ្ឋានពន្ធដារបានជំរុញឲ្យម្ចាស់អចលនទ្រព្យដែលពុំទាន់បំពេញកាតព្វកិច្ច ប្រញាប់ទៅបង់ពន្ធជូនរដ្ឋ ឲ្យបានមុនថ្ងៃផុតកំណត់ថ្ងៃទី៣០ ខែកញ្ញា ដោយស្ថាប័ននេះនិយាយថា ដើម្បីចៀសវាងការកកស្ទះនិងការប្រ ជ្រៀតគ្នានៅថ្ងៃចុងក្រោយនោះ។
អាជ្ញាធរពន្ធដារបានព្រមានចាត់វិធានការតាមផ្លូវច្បាប់ ប្រសិនបើម្ចាស់អចលនទ្រព្យណាមិនបានបំពេញកាតព្វកិច្ចនេះទេ។
កាលពីថ្ងៃម្សិលមិញនេះដែរ អគ្គនាយកដ្ឋានគយនិងរដ្ឋារករកម្ពុជាក៏បានក្រើនរំលឹកដល់ម្ចាស់យានយន្តគ្មានពន្ធគ្រប់ប្រភេទឲ្យបង់ពន្ធជូនរដ្ឋឲ្យបានមុនកាលបរិច្ឆេទកំណត់។
ក្នុងសេចក្ដីប្រកាសព័ត៌មានចេញកាលពីថ្ងៃម្សិលមិញ អគ្គនាយកដ្ឋានគយនិងរដ្ឋាករបាននិយាយថារដ្ឋាភិបាលបានផ្ដល់ភាពអនុគ្រោះដល់ម្ចាស់យានយន្តគ្មានពន្ធនិងរថយន្តចង្កូតស្ដាំរួចមកហើយ។
ទោះជាយ៉ាងណាស្ថាប័ននេះបញ្ជាក់ថា ម្ចាស់យានយន្តគ្មានពន្ធមួយចំនួននៅមិនតែបានទៅបង់ពន្ធអាករដល់រដ្ឋនៅឡើយ ខណៈដែលម្ចាស់រថយន្តចង្កូតស្ដាំដែលបានកក់ប្រាក់ពន្ធ២០ភាគរយរួចហើយនោះ ក៏នៅតែមិនទាន់បង់ពន្ធអាករបង្គ្រប់នៅឡើយដែរ។
អគ្គនាយកដ្ឋានគយនិងរដ្ឋាករបានព្រមានចាត់វិធានការទៅលើម្ចាស់រថយន្តទាំងពីរប្រភេទនេះ បន្ទាប់ពីកាលបរិច្ឆេទអនុគ្រោះផុតកំណត់។
កាលបរិច្ឆេទអនុគ្រោះសម្រាប់យានយន្តគ្មានពន្ធនឹងត្រូវផុតកំណត់នៅចុងខែសីហានេះ ខណៈដែលភាពអនុគ្រោះដល់រថយន្តចង្កូតស្ដាំនឹងផុតកំណត់នៅថ្ងៃទី១៩ខែកញ្ញាខាងមុខនេះ៕