គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសថា មានប្រជាពលរដ្ឋជាង៨៣ម៉ឺន៣ពាន់នាក់បានទៅចុះឈ្មោះបោះឆ្នោតនៅក្នុងរយៈពេល៥ថ្ងៃដំបូងនៃដំណើរការចុះឈ្មោះបោះឆ្នោតនៅទូទាំងប្រទេស។
ផ្អែកតាមប្រតិទិនរបស់ខ្លួន គ.ជ.ប បាននឹងកំពុងរៀបចំចុះឈ្មោះបោះឆ្នោតប្រជាពលរដ្ឋរៀងរាល់ថ្ងៃ ចាប់ពីដើមខែកញ្ញានេះរហូតដល់ចុងខែវិច្ឆិកាខាងមុខ។
យោងតាមលទ្ធផលបណ្ដោះអាសន្ននៃការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មីឆ្នាំ២០១៦ ចេញផ្សាយនៅល្ងាចថ្ងៃម្សិលមិញ គ.ជ.ប ចុះបញ្ជីប្រជាពលរដ្ឋបានជាង៨៣ម៉ឺន៣ពាន់នាក់ឬស្មើនឹងជាង៨ភាគរយនៃចំនួនពលរដ្ឋគ្រប់អាយុបោះឆ្នោតសរុបជាង៩លាន៦៦ម៉ឺននាក់នៅទូទាំងប្រទេស។
យោងតាមរបាយការណ៍ គ.ជ.ប ចំនួនអ្នកចុះឈ្មោះបោះឆ្នោតនេះបានកើនឡើងពីចំនួនជាង១១ម៉ឺន៥ពាន់នាក់ គិតត្រឹមល្ងាចថ្ងៃម្សិលមិញនេះធៀបទៅនឹងថ្ងៃទី៤ខែកញ្ញាកន្លងមក។
គ.ជ.ប កាលពីចុងសប្ដាហ៍កន្លងមកនេះក៏បានសម្រេចឲ្យមានការចុះឈ្មោះបោះឆ្នោតនៅអំឡុងពិធីបុណ្យភ្ជុំបិណ្ឌនាពេលខាងមុខផងដែរ៕