អាជីវករលក់ដូរនៅចិញ្ចើមផ្លូវក្បែរមហោស្របចេនឡា ផ្សារដើមគរ បានឲ្យដឹងថា សន្តិសុខរឹបអូសសម្ភារៈពួកគេដែលលក់ដូរលើចិញ្ចើមផ្លូវ ដោយថាកុំឲ្យប៉ះពាល់ដល់សណ្តាប់ធ្នាប់សាធារណៈ។
អាជីវករលក់បន្លែ ផ្លែឈើ នៅផ្សារដើមគរ អ្នកស្រី ណឹប សឿន បានរៀបរាប់ប្រាប់អ្នកយកព័ត៌មានថា កាលពីថ្ងៃចន្ទ ក្រុមសន្តិសុខបានចុះរឹបអូសសម្ភារៈនិងបន្លែ ផ្លែឈើពីពួកគេចំនួន៣កន្លែង ដែលកំពុងលក់ដូរនៅលើចិញ្ចើមផ្លូវ បញ្ជូនទៅរក្សាទុកនៅក្នុងការរិយាល័យផ្សារ ដោយថាកុំឲ្យប៉ះពាល់សណ្តាប់ធ្នាប់សាធារណៈ ប៉ុន្តែអ្នកស្រីថា ត្រូវបានអាជ្ញាធរប្រគល់ឲ្យវិញ ក្រោយពីមានការតវ៉ា។ អ្នកស្រីនិយាយថា៖ «ដេញម្សិលមិញចាប់ឆ័ត្រចូលការិយាល័យផ្សារដើមគរ ដេញអត់ចង់ឲ្យដាក់នៅខាងក្រោម គេឲ្យលើកឡើងមកលើខាងក្រោយ ហើយឡើងលើណា លក់អត់ដាច់ ខុសកន្លែងលក់អត់ដាច់ បាត់បង់ថវិកា ម្សិលមិញលក់អត់ដាច់ទេ ពេញមួយល្ងាច»។
អាជីវករម្នាក់ទៀតអ្នកនាង វណ្ណ មិនា បានឲ្យដឹងដែរថា ជារៀងរាល់ព្រឹកនៅតាមដងផ្លូវផ្សារដើមគរចាប់ពីមហោស្របចេនឡារហូតដល់ច្រកផ្សារនាគមាស អាជីវករមួយចំនួនបានលក់ដូរនៅតាមចិញ្ចើមផ្លូវហូហែរ ប៉ុន្តែគាត់ថាមិនឃើញសន្តិសុខបណ្តេញអ្នកលក់ទំាងនោះទេ។
អ្នកនាង វណ្ណ មិនា បញ្ជាក់ថា បើពេលល្ងាចរហូតដល់ទៀបភ្លឺចាប់ពីមហោស្របចេញឡារហូតដល់ផ្សារនាគមាសអមតាមដងផ្លូវ អាជីវកររាប់សិបតូប បានដាក់លក់បន្លែ ផ្លែឈើ លើចិញ្ចើមផ្លូវ ប៉ុន្តែអាជ្ញាធរក៏មិនបានបណ្តេញនិងរឹបអូសយកសម្ភារៈក្រុមអាជីវករទាំងនោះទេ។
ករណីទំាងនេះ អ្នកនាង វណ្ណ មិនា ស្នើសុំឲ្យសន្តិសុខ ឬប្រធានផ្សារ ត្រូវកំណត់ឲ្យច្បាស់ពីទីតំាង សម្រាប់ឲ្យអាជីវករលក់ដូរក្បែរចិញ្ចើមផ្លូវឲ្យមានតម្លាភាពទំាងអស់គ្នា ជាជាងអនុវត្តមានភាពលម្អៀង។ អ្នកនាងអះអាងថា៖ «ប្រសិនបើគាត់បណ្តេញអ្នកលក់ចិញ្ចើមថ្នល់ គាត់គួរតែបណ្តេញទំាងអស់គ្នា ឬមួយបើគាត់រៀបចំ ពួកគាត់រៀបចំទំាងអស់គ្នា ដើម្បីឲ្យតម្លាភាពគ្នា ឲ្យមើលទៅសមដូចថាបើគេលក់បាន ខ្ញុំត្រូវលក់បាន បើខ្ញុំលក់មិនបាន គេលក់មិនបានដូចគ្នា ព្រោះកណ្តាលថ្នល់ដូចគ្នា»។
VOD មិនអាចសុំការបំភ្លឺពីប្រធានផ្សារដើមគរ លោក សារ៉ន បានទេនៅព្រឹកថ្ងៃអង្គារនេះ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ យល់ថា ការរឹបអូសម្ភារៈរបស់អាជីវករលក់នៅក្បែរចិញ្ចើមផ្លូវជាការរើសអើងពួកគេ។ លោកផ្តល់ជាយោបល់ថា ដើម្បីទប់ស្កាត់បញ្ហានេះឲ្យមានប្រសិទ្ធិភាព គណៈកម្មការផ្សារត្រូវរៀបចំទីកន្លែងលក់ឲ្យពួកគេឲ្យបានសមរម្យ និងធ្វើរបងព័ទ្ធជុំវិញកន្លែងលក់ដូរនោះ។ លោកលើកឡើងថា៖ «ដើម្បីឲ្យមានភាពល្អប្រសើរទំាងសងខាងគួរតែរៀបចំទំាងអស់គ្នាសណ្តាប់ធ្នាប់ គឺលក់ដូរកន្លែងណាដែលមានសុវត្ថិភាព សណ្តាប់ធ្នាប់គឺត្រូវរៀបចំរបងមួយត្រឹមចង្គុង ឬត្រឹមចង្កេះ ដើម្បីកំណត់លីមីតកន្លែងលក់ កុំឲ្យគាត់ចេះតែហៀមកខាងផ្លូវថ្នល់ គឺជាការរៀបចំសណ្តាប់ធ្នាប់មួយយ៉ាងល្អដែលអាចមានប្រសិទ្ធភាព ព្រោះប្រទេសគេជិតខាង ក៏គេធ្វើបែបនេះដែរ»។
កាលពីថ្ងៃទី៩ ខែធ្នូ ឆ្នាំ២០១៦ លោកនាយករដ្ឋមន្ត្រី ហ៊ុន សែន បានសរសេរលើគេហទំព័រហ្វេសប៊ុករបស់លោកថា ដើម្បីកាត់បន្ថយនូវភាពក្រីក្រនិងលើកកម្ពស់ជីវភាពរស់នៅរបស់ប្រជាពលរដ្ឋ លោកបានពិភាក្សាជាមួយរដ្ឋមន្រ្តី ក្រសួងសេដ្ឋកិច្ច និងហិរញ្ញវត្ថុ ចេញ «សារាចរស្ដីពីការលុបចោលចំពោះការបង់ថ្លៃ» ដល់ប្រជាពលរដ្ឋលក់ដូរតាម កញ្ច្រែង កញ្ជើ ល្អី គឺមិនចាំបាច់បង់ថ្លៃឡើយ។
កន្លងទៅអ្នកលក់ដូរតាមដងផ្លូវមួយចំនួនបានត្អូញត្អែរថា ពួកគេត្រូវបានអាជ្ញាធរបណ្តេញពីកន្លែងមួយទៅកន្លែងមួយទៀត ឬរឹបអូសយកសម្ភារៈលក់ដូរ ដោយសំអាងពីការរៀបចំសណ្តាប់ធ្នាប់ បើទោះបីពួកគេបានបង់ប្រាក់ប្រចាំថ្ងៃឲ្យអាជ្ញាធរ អ្នកដើរទារភាស៊ីចល័ត និងប៉ូលិសសណ្តាប់ធ្នាប់ហើយក៏ដោយ៕