កូនស្រីច្បងរបស់អ្នកស្រី ទេព វន្នី ថ្លែងថា ពេលនេះគាត់កំពុងតែមានជំងឺឈឺក្បាលជាប្រចាំ ហើយមានអារម្មណ៍ឯកោ និងសង្ឃឹមថា ម្តាយខ្លួនចេញពីពន្ធនាគាររស់នៅជុំគ្នាវិញឆាប់ៗ។
ខណៈតុលាការកំពូលកំពុងកាត់ទោសម្តាយនោះ កុមារី អ៊ួ គង់បញ្ញា អង្គុយនៅខាងមុខតុលាការជាមួយអ្នកភូមិផ្សេងទៀត ក្នុងចិត្តសង្ឃឹមថា ចៅក្រមដោះលែងម្តាយឲ្យមានសេរីភាពវិញ។
កុមារីអាយុ១៤ឆ្នាំរូបនេះ ថ្លែងថា គាត់មានអារម្មណ៍ស្មុគស្មាញ ហើយចង់ដេកអោបម្តាយដូចមុន។
កុមារីថា៖ «អត់សប្បាយចិត្ត ព្រោះខានដេកអោបគាត់យូរហើយ ចង់ដេកអោបគាត់!ចង់ឲ្យតុលាការឲ្យម៉ាក់ចេញមកវិញ ១ ឆ្នាំ ជិត២ ឆ្នាំហើយ នឹកគាត់បានជួបគាត់មួយភ្លេចដែរ មិញហ្នឹង មកពីសល់ពេលអត់ទាន់ដល់ពេលទៅរៀនជួបគាត់មួយភ្លេចទៅ»។
គង់បញ្ញា ថ្លែងថា ពេលនេះ គាត់មានជំងឺខួរក្បាលត្រូវការប្រើប្រាស់ថ្នាំជាប្រចាំ។ បញ្ញារំឭកថា កាលមុនពេលឈឺមានម្តាយមើលថែ ជួបការលំបាកអីគាត់ជួយ ប៉ុន្តែពេលនេះម្តាយបានតែត្រឹមសួរសុខទុក្ខម្តងម្តាល ពេលនាងទៅជួបនៅពន្ធនាគារតែប៉ុណ្ណោះ។
កុមារីថា៖ «ពេលឈឺវិញ បើនៅនោះគាត់ឧស្សាហ៍មើលតែបើនៅនោះគាត់អត់បានមើលទេ គាត់បានមានពេលតែសួរសុខទុក្ខ ពេលទៅសួរគាត់! គាត់សួរម៉េចហើយ ឈឺនឹងបាត់នៅ ឈឺដូចមុននៅតិចៗដែរ វាអត់ទាន់បាត់ម៉ង់ទេ ឥឡូវគ្រាន់តែឈឺក្បាលតិចៗ តែអត់អីទេ ពេលទៅដល់ផ្ទះញុំបាយ លេបថ្នាំលែងអីហើយ»។
កុមារី អ៊ួ គង់បញ្ញា មិនសូវពូកែនិយាយដូចម្តាយរបស់នាងនោះទេគឺ ពេលខ្លះសួរមួយម៉ាត់ ឆ្លើយមួយម៉ាត់។ នាងចូលចិត្តនៅកន្លែងស្ងៀមស្ងាត់ ទឹកមុខស្រពោនខុសពីកុមារដទៃទៀត។
អ្នកស្រី ទេព វន្នី មានកូនប្រុសម្នាក់ទៀត អាយុ១១ឆ្នាំ ឈ្មោះ អ៊ូ គង់នាគរាជ្យ។ កូនប្រុសម្នាក់នេះក៏មានលក្ខណៈមិនខុសបងស្រីប៉ុន្មានដែរ ហើយចំពោះអ្នកផ្សេងមិនដែលស្គាល់នោះ កុមាររូបនេះមិននិយាយជាមួយទេ។
សកម្មជនដីធ្លីម្នាក់កញ្ញា សុង ស្រីលាភ ដែលតែងតែទៅមើលកូនៗរបស់អ្នកស្រី ទេព វន្នី លើកឡើងថា តាំងពីម្ដាយជាប់ពន្ធនាគារមក កូនៗទាំងនេះ មិនដែលចេញមកលេងខាងក្រៅជាមួយក្មេងផ្សេងៗទៀតនោះ។
កញ្ញាថា «គាត់ខ្លាចពាក្យនិយាយខាងក្រៅ មានអ្នកខ្លះសួរគាត់ម៉ាក់ឯងទៅណា ឬក៏ម៉ាក់ឯងធ្វើអី ឬក៏ខ្លាចទៀតអាចថា ម៉ាក់ឯងជាប់គុក ដល់ពេលអញ្ចឹងទៅមកពីអារម្មណ៍គាត់ខ្លាចលឺពាក្យអស់ទាំងហ្នឹងហើយ បានជាគាត់ចេះតែសំងំនៅក្នុងផ្ទះ»។
កញ្ញាបន្តថា ពេលដែលពួកគាត់ទៅមើលអ្នកស្រី ទេព វន្នី នៅពន្ធនាគារ អ្នកស្រី ទេព វន្នី តែងតែព្រួយបារម្ភពីកូនរបស់គាត់ ដោយសារ នាងមានជំងឺច្រើនជាពិសេសបញ្ហាខួរក្បាល។
កាលពីឆ្នាំ២០១៧ ពេលនាំខ្លួនចូលរួមសវនានៅសាលាឧទ្ធរណ៍ អ្នកស្រី ទេព វន្នី បានស្រែកទ្រហោយំសុំឲ្យដោះលែងអ្នកស្រី ដើម្បីបានទៅមើលថែកូនស្រី សម្រាកនៅមន្ទីរពេទ្យវះកាត់ពោះវៀនដុះខ្នែង។ ប៉ុន្តែសំណើនេះ មិនមានការឆ្លើយតបទេ។
នៅថ្ងៃពុធនេះ ចៅក្រមជំនុំជម្រះតុលាការកំពូល បានសម្រេចឲ្យបន្តឃុំខ្លួនអ្នកស្រីបន្តទៀត ដូចការសម្រេចរបស់សាលាដំបូងរាជធានីភ្នំពេញដដែលគឺជាប់ពន្ធនាគារ២ឆ្នាំ៦ខែ។ លទ្ធផលនៅថ្ងៃនេះធ្វើឲ្យក្តីរំពឹងរបស់កូនៗ អ្នកស្រី ទេព វន្នី នៅតែមើលមិនឃើញកោះត្រើយ៕