នៅពេលថ្មីនេះតាមបណ្តាញសង្គមនិងគេហទំព័រក្នុងស្រុកមួយចំនួនបានព្យាយាមផ្សព្វផ្សាយជាបន្តបន្ទាប់នូវខ្សែអាត់សំឡេងសន្ទនាតាមទូរសព្ទពីទំនាក់ទំនងស្នេហាលួចលាក់ដែលគេអះអាងថាជាសំឡេងរបស់ប្រធានស្តីទីគណបក្សសង្គ្រោះជាតិលោក កឹម សុខា។
ការផ្សព្វផ្សាយខ្សែអាត់សំឡេងថាលោក កឹម សុខា មានស្នេហាលួចលាក់ជាបន្តបន្តាប់មានភាគ១ ភាគ២ រហូតដល់ជាង១០ភាគបន្តបន្ទាប់ទៀត។
ក្រោយពីការផ្សព្វផ្សាយនេះគេសង្កេតឃើញយុវជន និស្សិត និងមនុស្សមួយចំនួនទៀតបានចេញមុខទៅដាក់ញត្តិនៅទីស្កាក់ការគណបក្សសង្គ្រោះជាតិនៅរាជធានីភ្នំពេញនិងខ្លះទៀតស្វែងរកជួបលោក កឹម សុខា ពេលមេដឹកនាំរូបនោះចុះជួបពលរដ្ឋនៅមូលដ្ឋានដោយពួកគេអះអាងថាចង់ឲ្យលោក កឹម សុខា បកស្រាយថាតើសំឡេងបែកធ្លាយនោះជាការពិតឬជាការប្រឌិត។
ម្យាងវិញទៀតការទម្លាយខ្សែអាត់ពីស្នេហាលួចលាក់របស់លោក កឹម សុខា នេះស្របពេលដែលយុទ្ធនាការនៃការឃោសនារកសំឡេងឆ្នោត សម្រាប់ឃុំ សង្កាត់ជិតចូលមកដល់។
ការរិះគន់រដ្ឋាភិបាលទាក់ទិននឹងការបោះបង្គោលព្រំដែនជាមួយប្រទេសវៀតណាម ពុករលួយក្នុងសង្គម តុលាការមិនឯករាជ្យ អំពើចោរកម្ម ការរំលោភដីធ្លី ភាពអត់ការងារធ្វើរបស់យុវជន និងការបាត់បង់ធនធានធម្មជាតិ ដូចជាបទល្មើលព្រៃឈើជាដើមនៅតែបន្តធ្វើឡើង។
តើមានហេតុផលអ្វីនៅពីក្រោយនៃការបញ្ចេញខ្សែអាត់សំឡេងថាលោក កឹម សុខា មានស្នេហាលួចលាក់នៅនេះ?
សាស្ត្រាចារ្យវិទ្យាសាស្ត្រនយោបាយលោក សូ ចន្ថា វិភាគថាការបញ្ចេញខ្សែអាត់សំឡេងនោះលោកថាអាចថាជាចេតនា របស់អ្នកនយោបាយណាមួយដើម្បីបិទបាំងកុំឲ្យសាធារណជនចាប់អារម្មណ៍ទៅលើបញ្ហាជាតិធំៗប៉ះពាល់នឹងផលប្រយោជន៍ជាតិដែលមិនទាន់អាចទប់ស្កាត់បាន ហើយបង្វែរស្ថានការណ៍នោះឲ្យទៅចាប់អារម្ភតែរឿងបុគ្គល ខណៈរដូវបោះឆ្នោតជិតមកដល់។ លោកបន្តថា៖ “មានន័យថាកន្លែងនេះអាចជាការរៀបចំរបស់គណបក្សប្រជាជនដើម្បីបង្វែរការចាប់អារម្មណ៍របស់ប្រជាជនកុំឲ្យចាប់អារម្មណ៍ពីការធ្វើរុះរើគណៈរដ្ឋមន្ត្រីនិងឬក៏រឿងព្រំដែនឲ្យមកចាប់អារម្មណ៍រឿងលោក កឹម សុខា វិញបាទ”។
លោក សូ ចន្ថា វិភាគទៀតថាការទម្លាយខ្សែអាត់សំឡេងនេះអាចជាជួងដាស់អារម្មណ៍ដល់អ្នកគាំទ្រឲ្យចាប់ផ្តើមធ្វើយុទ្ធនាការចុះរំខានសកម្មភាពធ្វើនយោបាយរបស់បក្សប្រឆាំងចាប់ពីពេលនេះទៅពិសេសការចុះជួប អ្នកគាំទ្រនៅថ្នាក់មូលដ្ឋាន។
លោក សូ ចន្ថា វិភាគថាការចុះរំខាននេះបើមានទ្រង់ទ្រាយធំទៅៗអាចធ្វើឲ្យបក្សប្រឆាំងពិចារណាកាត់បន្ថយការចុះជួបពលរដ្ឋនៅថ្នាក់មូលដ្ឋានដោយបារម្ភពីសុវត្ថិភាពនិងការផ្ទុះហិង្សា។ លោកថាពេលនោះបក្សប្រឆាំងអាចបាត់ឱកាសខ្លះក្នុងការទាក់ទាញប្រជាប្រិយភាពពីម្ចាស់ឆ្នោតក្នុងរដូវឃោសនា។
សាស្ត្រាចារ្យរូបនោះវិភាគទៀតថាមួយវិញទៀតការបញ្ចេញខ្សែអាត់នោះអាចជាយុទ្ធសាស្ត្រថ្មីរបស់បក្សកាន់អំណាចនៅពេលដែលយុទ្ធសាស្ត្រចាស់ចាប់សកម្មជនបក្សប្រឆាំងដាក់គុកជាថ្នូរនឹងការដោះដូរនយោបាយលែងមានប្រសិទ្ធិភាពនៅដែលបក្សប្រឆាំងប្រកាសប្រឹងរត់ទៅរកទីលានប្រកួតនៃការបោះឆ្នោតដោយលែងតបតលែងឆ្លងឆ្លើយអ្វីទាំងអស់ដើម្បីត្រៀមខ្លួនឆ្ពោះទៅរកឈ្នះការបោះឆ្នោតឆ្នាំ២០១៧និង២០១៨។
លោកបន្ថែមថា៖ “កន្លងទៅគណបក្សប្រជាជនតែងតែប្រើយុទ្ធសាស្ត្រចាប់សកម្មជនដើម្បីគំរាមបក្សប្រឆាំងក្នុងន័យថាដើម្បីឲ្យមានការចរចា ហើយសម្របសម្រួលឲ្យដោះលែងសកម្មជនទាំងនោះ។ ប៉ុន្តែនៅពេលដែលមិនមានការសម្របសម្រួល ហើយមិនមានការទាមទារទៀតពីបក្សប្រឆាំងខ្ញុំគិតថាយុទ្ធសាស្ត្រនេះវាអស់តម្លៃហើយមិនអាចសម្លុតគំរាមបក្សប្រឆាំងតទៅទៀតបានដូចករណីបញ្ចេញខ្សែអាត់ជាដើម។ ពិសេសគណបក្សប្រឆាំងលោក កឹម សុខា មិនតបតមិនខ្វល់ពីបញ្ហានេះខ្ញុំគិតថានេះអត់មានន័យទាំងអស់ដោយអត់មានការចាប់អារម្មណ៍ពីគូប្រកួតនោះបាទ”។
កន្លងទៅមេដឹកនាំបក្សកាន់អំណាចលោក ហ៊ុន សែន និងមេដឹកនាំបក្សប្រឆាំងលោក សម រង្ស៊ី រួមទាំងលោក កឹម សុខា ផង បានប្រើវោហាសាសន៍វាយបកគ្នាទៅវិញទៅមកឥតសម្ចីមាត់ពីចំនុចខ្សោយរបស់ដៃគូប្រកួតដើម្បីស្វែងរកប្រជាប្រិយភាពតែរៀងៗខ្លួន។
ការប្រើសង្គ្រាមពាក្យសម្តីដូចជាក្បត់ជាតិ លក់ទឹកដី ដឹកនាំបែបផ្តាច់ការ បំផ្លាញទ្រព្យសម្បត្តិជាតិជាដើមនោះ គេសង្កេតឃើញមេដឹកនាំបក្សប្រឆាំងលោក សម រង្ស៊ី បានសម្រេចចិត្តនិរទេសខ្លួនទៅរស់នៅក្រៅប្រទេសម្តងទៀតដើម្បីគេចចេញពីការតាមចាប់ខ្លួនរបស់តុលាការ។
លោក កឹម សុខា ត្រូវបានបានតំណាងរាស្ត្រភាគច្រើនរបស់គណបក្សប្រជាជនកម្ពុជាបោះឆ្នោតដកតំណែងពីអនុប្រធានទី១នៃរដ្ឋសភា។
តំណាងរាស្ត្រពីររូបរបស់គណបក្សប្រឆាំងត្រូវបាតុករគាំទ្របក្សកាន់អំណាចវាយឲ្យរងរបួសធ្ងន់នៅជាប់របងរដ្ឋសភា។ សម្មជនជននិងសមាជិកព្រឹទ្ធសភារបស់បក្សប្រឆាំងត្រូវបក្សកំពុងគ្រប់គ្រងអំណាចប្តឹង ហើយពេលនេះពួកគេទាំង១៥នាក់ កំពុងឃុំខ្លួននៅពន្ធនាគារព្រៃស។
អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី លើកឡើងថាបក្សកាន់អំណាចបានបរាជ័យនូវយុទ្ធសាស្ត្រធំៗពីរគឺយុទ្ធសាស្ត្រទិញទឹកចិត្តតាមរយៈផ្តល់តំណែងនិងយុទ្ធសាស្ត្របំបែកបំបាក់។
ប៉ុន្តែលោកថាយុទ្ធសាស្ត្រគំរាមកំហែងរបស់បក្សគ្រប់គ្រងអំណាចមួយនេះនៅមានប្រសិទ្ធភាពនៅឡើយ។ លោកថាការបញ្ចេញខ្សែអាត់សំឡេងថាលោក កឹម សុខា មានស្រីកំណាន់ចិត្ត លោកថាអាចជាការបង្កើតព្រឹត្តិការណ៍ដើម្បីគ្រប់គ្រងព្រឹត្តិការណ៍ លោកថាបើបក្សប្រឆាំងខ្វះការអត់ធ្មត់ហើយគ្រប់គ្រងស្ថានការណ៍អត់បានបង្កឲ្យមានហិង្សាក្នុងហេតុការណ៍ណាមួយពេលមនុស្សមួយក្រុមទៅរំខានវេទិកាចុះជួបប្រជាពលរដ្ឋនៅថ្នាក់មូលដ្ឋាននោះ។
មួយទៀតលោក មាស នី ថាអាចជារូបភាពថ្មីឲ្យភាគីទី៣អនុវត្តរូបមន្តចាស់បិទទ្វារវ៉ៃឆ្កែបំបាក់ស្មារតីសកម្មជនបក្សប្រឆាំង។
លោកថា៖ “ក្នងនាមជាអ្នកវិភាគខ្ញុំគិតថាអាចនឹងមានស្ថានការណ៍ចំលែកៗដែលត្រូវគេបង្កើតឡើងចាប់ពីពេលនេះដល់ពេលបោះឆ្នោតអញ្ចឹងរឿងយកខ្សែអាត់មកផ្សាយនេះវាគ្រាន់តែជាករណីមួយក្នុងករណីច្រើនទៀតហើយខ្ញុំក៏នៅរំពឹងថានយោបាយបិទទ្វារវ៉ៃឆ្កែនេះនឹងបន្តធ្វើតទៅទៀតបាទ”។
ចំណែកអ្នកនាំពាក្យគណបក្សប្រជាជនកម្ពុជាដែលកំពុងគ្រប់គ្រងអំណាចវិញគឺលោក សុខ ឥសាន អះអាងថាបក្សកាន់អំណាចមិនបាននៅពីក្រោយនៃការលួចបញ្ចេញខ្សែអាត់សំឡេងទាក់ទិននឹងលោក កឹម សុខា នេះទេនិងបានរំឭកឲ្យអ្នកវិភាគស្វែងយល់ពីផ្លូវច្បាប់បើសិនមានការប្តឹងបកវិញពីបទបរិហាកេរ្តិ៍។
លោកបន្តថា៖ “គាត់មានភស្តុតាងអីគាត់គ្រាន់តែនិយាយទេអី បើគ្មានភស្តុតាងអីកុំចេះតែនិយាយប្រយ័ត្នគេប្តឹងពីបទបរិហាកេរ្តិ៍តុលាការឲ្យរកភស្តុតាងមកឲ្យ។ អាហ្នឹងអ្នកវិភាគណាក៏ដោយកុំចេះតែនិយាយនាំឲ្យល្អក់កករក្នុងសង្គមជាតិ។ បាទ! ខ្ញុំសុំបដិសេធទាំងស្រុងគណបក្សប្រជាជនអត់មានពាក់ព័ន្ធអីនឹងរឿងបុគ្គលហ្នឹងទេ បើមានបញ្ហាអីបុគ្គលហ្នឹងទទួលខុសត្រូវខ្លួនឯងទៅកុំចោទដាក់គេដាក់ឯង”។
ទោះជាយ៉ាងណាលោក មាស នី ជំរុញឲ្យអ្នកនយោបាយឈប់យករឿងបុគ្គលទៅវាយប្រហារគ្នា ហើយងាកមកគិតប្រយោជន៍ជាតិជាធំនិងដាក់ខ្លួនជាកីឡាករក្នុងការប្រកួតប្រជែងជាមេដឹកនាំប្រទេសនោះលោកថាទើបអាចនាំប្រទេសជាតិនិងពលរដ្ឋខ្លួនទៅរកភាពរីកចម្រើនបាន។
លោកបន្តទៀតថា៖ “បើយើងមើលពីដើមមកអ្នកដឹកនាំទាំងពីរហ្នឹងបានធ្លាក់ទៅក្នុងអន្លង់មួយតាមរយៈសងសឹកគ្នាតាមរយៈឯកជន។ ប៉ុន្តែនៅប៉ុន្មានខែចុងក្រោយនេះយើងឃើញគណបក្សសង្គ្រោះជាតិបានដើរទៅលើផ្លូវថ្មីមួយគឺឈប់តតាំង ហើយឈប់អង្វរ ប៉ុន្តែចាប់ផ្តើមបង្ហាញពីគោលនយោបាយ។ ខ្ញុំគិតថាបើសិនជាអ្នកនយោបាយដែលសម្រាប់តែធ្វើឲ្យប្រទេសបានប្រសើរឡើងពេលនឹងអំពើហិង្សាក៏ឈប់មាន ហើយការគុំកួនរបស់ថ្នាក់ដឹកនាំហ្នឹង ក៏គ្មានដែរ។ អញ្ចឹងយើងឃើញថានៅពេលគណបក្សសង្គ្រោះជាតិបានដើរលើផ្លូវថ្មីហ្នឹងយើងឃើញថាគណបក្សប្រជាជនកម្ពុជាហ្នឹងអត់ទាន់រើខ្លួនចេញអាប្រពៃណីចាស់របស់ខ្លួនឯងទេគឺនៅតែការរក្សាការរបៀបចង់សងសឹកនៅដដែលវិញ”។
យ៉ាងណាក៏ដោយទាំងសាស្ត្រាចារ្យវិទ្យាសាស្ត្រនយោបាយនិងអ្នកស្រាវជ្រាវពីការអភិវឌ្ឍសង្គមយល់ឃើញប្រហាក់ប្រហែលគ្នាថាការបញ្ចេញខ្សែអាត់សំឡេងថាប្រធានស្តីទីគណបក្សសង្គ្រោះជាតិលោក កឹម សុខា មានស្នេហាលួចលាក់នេះ ពួកគេថាបក្សប្រឆាំងមួយនេះអាចនឹងធ្លាក់ចុះប្រជាប្រិយភាពក្នុងកម្រិតណាមួយបើសាធារណជនមានការយល់ដឹងតិចតួចពីការតាមដានស្ថានការណ៍នយោបាយនៅកម្ពុជា។
ប៉ុន្តែពួកគេថាបើពលរដ្ឋស្គាល់ច្បាស់ពីបញ្ហានិងចេះតាមដានពីទង្វើរបស់អ្នកនយោបាយ អ្នកវិភាគថាការបញ្ចេញខ្សែអាត់សំឡេងនោះអាចជាក្លាយទៅជាការជួយផ្សាយពាណិជ្ជកម្មជំរុញឲ្យបក្សប្រឆាំងមួយនោះកាន់តែកើនប្រជាប្រិយភាពទៅវិញទេ៕