គណបក្សនយោបាយមួយបានស្នើរដ្ឋាភិបាលឲ្យដោះលែងអតីតប្រធានបក្សប្រឆាំងលោក កឹម សុខា ដោយថាដើម្បីបន្ធូរស្ថានការណ៍នយោបាយបច្ចុប្បន្ន ដែលគណបក្សនេះមើលឃើញថាស្ថានការណ៍កាន់តែអាក្រក់ខ្លាំងឡើង។
ក្នុងសេចក្តីថ្លែងការណ៍ចុះថ្ងៃទី៧ មីនានេះគណបក្សប្រជាធិបតេយ្យមូលដ្ឋានបានសម្តែងការព្រួយបារម្ភពីការឡើងកម្តៅនយោបាយនៅប្រទេសកម្ពុជា ដែលធ្វើឲ្យប៉ះពាល់កិត្តិយស និងសេចក្តីថ្លៃថ្នូររបស់កម្ពុជាលើឆាកអន្តរជាតិ ដោយស្នើឲ្យរដ្ឋាភិបាលដោះលែងលោក កឹម សុខា និងអ្នកទោសនយោបាយផ្សេងទៀតឲ្យមានសេរីភាពវិញ ។
ក្នុងសេចក្តីថ្លែងការណ៍គណបក្សនេះក៏បានស្នើឲ្យរដ្ឋាភិបាលបង្កបរិយាកាសទូលំទូលាយដល់អ្នកសារព័ត៌មាន ដើម្បីបំពេញតួនាទីដោយគ្មានការភ័យខ្លាច និងរៀបចំការបោះឆ្នោតខាងមុខប្រកបដោយយសេរី និងយុត្តិធម៌ ដោយត្រូវមានអ្នកសង្កេតការណ៍ជាតិ និងអន្តរជាតិបានពេញលេញផងដែរ។
ស្ថានការណ៍នយោបាយកម្ពុជាបច្ចុប្បន្នហាក់បានកើនកម្តៅកាន់តែខ្លាំងបន្ទាប់ពីរដ្ឋាភិបាលលោកនាយករដ្ឋមន្ត្រីហ៊ុន សែន បានចាប់ប្រធានបក្សសង្គ្រោះជាតិលោក កឹម សុខា ដាក់ពន្ធនាគារដោយបានចោទពីបទក្បត់ជាតិ និងរំលាយគណបក្សនេះ ខណៈដែលអន្តរជាតិកំពុងពិចារណាដាក់ទណ្ឌកម្មជាបន្តបន្ទាប់មកកម្ពជា៕
