ប្រធានគណៈកម្មាធិការសិទ្ធិមនុស្សកម្ពុជា និងអ្នករាយការណ៍ពិសេសអង្គការសហប្រជាជាតិ មិនអាចរកចំណុចរួមនិងត្រូវគ្នាបាននោះទេ ដោយខ្វែងគំនិតគ្នាពីការអនុវត្តច្បាប់ប៉ះពាល់សិទ្ធិមនុស្សនៅកម្ពុជា។ នេះបើតាមការអះអាងរបស់ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី។
ការខ្វែងគំនិតនេះ គឺកើតឡើងក្នុងកិច្ចប្រជុំមួយរវាងគណៈកម្មាធិការសិទ្ធិមនុស្ស និងលោកស្រី រ៉ូណា ស្មីត នៅព្រឹកនេះ។
បន្ទាប់ពីប្រជុំបិទទ្វារដែលមានរយៈពេលជាង២ម៉ោងរួចមក លោកស្រី រ៉ូណា ស្មីត បានឲ្យអ្នកសារព័ត៌មានដឹងយ៉ាងខ្លីថា ការជជែកនោះលោកស្រីបានផ្តោតទៅលើស្ថានភាពនយោបាយ សិទ្ធិមនុស្ស និងផ្នែកខ្លះ ក៏បានលើកពីស្ថានភាពកម្មករនៅកម្ពុជាផងដែរ។
ប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី បានឲ្យអ្នកសារព័ត៌មានបន្ថែមថា ចំណុចដែលខ្វែងគំនិតគ្នានោះ គឺការយល់ឃើញខុសគ្នាពីសិទ្ធិមនុស្ស និងការអនុវត្តច្បាប់នៅកម្ពុជា ខណៈដែលលោកថាលោកស្រីរ៉ូណាស្មីតបានចោទរដ្ឋាភិបាលថាមិនបានអនុវត្តន៍ប្រព័ន្ធនីតិរដ្ឋបានត្រឹមត្រូវ និងប្រើប្រាស់ពាក្យសន្តិភាពក្នុងការរារាំងសិទ្ធិមនុស្សនៅក្នុងប្រទេស។
លោកថា៖ «តួនាទីរដ្ឋាភិបាលខុសពីតួនាទីក្នុងការពារសិទ្ធិមនុស្សរបស់គាត់ រដ្ឋាភិបាលដើម្បីគ្រប់គ្រងប្រទេសមួយ ប្រសិនជាយើងចង់ការពារមនុស្សចំនួនធំណាមួយរាប់លាននាក់ យើងត្រូវមានអារកាត់ ប៉ះពាល់មិនខានទេ នូវជ្រុងណាមួយ ហើយជាពិសេសគឺយើងជំរុញឲ្យមានការអនុវត្តន៍ច្បាប់។ … ដល់អញ្ចឹងទៅយើងជម្រាបជូនគាត់ថា សរុបសេចក្តីមក ខ្ញុំជឿជាក់ថាថ្ងៃណាមួយ! ពេលនេះគាត់យល់ខុសមកលើរដ្ឋាភិបាល ក៏ប៉ុន្តែថ្ងៃណាមួយគាត់នឹងយល់ត្រូវ គាត់នឹងយល់ឃើញថារដ្ឋាភិបាលធ្វើត្រូវ សំខាន់បំផុតខ្ញុំថា សំខាន់នៅពេលដែលអ្នកឯងយល់ថាកម្ពុជាកំពុងធ្វើត្រូវ ប្រហែលជាអ្នកឯងប្តូរតួនាទីលែងធ្វើផ្នែកសិទ្ធិមនុស្សហើយ» ។
ខណៈលោកស្រី រ៉ូណា ស្មីត នឹងដាក់របាយការណ៍ស្តីពីស្ថានភាពសិទ្ធិមនុស្សនៅកម្ពុជាទៅកាន់អង្គការសហប្រជាជាតិនាខែកញ្ញាខាងមុខនេះ លោក កែវ រ៉េមី ថាលោកមិនគិតថាលោកស្រីសរសេរល្អពីរដ្ឋាភិបាលនោះទេ។
អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត បានចាប់ផ្ដើមទស្សនកិច្ចនៅកម្ពុជា ចាប់ពីថ្ងៃទី៥ រហូតដល់ថ្ងៃទី១៤ខែមីនា ក្នុងគោលបំណងធ្វើរបាយការណ៍សិទ្ធិមនុស្សប្រចាំឆ្នាំ ដាក់ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ នាខែកញ្ញាឆ្នាំ២០១៨៕