យ៉ាងហោចណាស់បុរសពីរនាក់ បានរងបួសស្រាល និងផ្ទះបីខ្នងទៀតរងការខូចខាត ក្នុងឧបទ្ទវហេតុអគ្គិភ័យ ឆាបឆេះផ្ទះពលរដ្ឋនៅសៀមរាប ដែលបណ្ដាលមកពីផ្ទុះធុងហ្គាសនៅព្រឹកថ្ងៃសុក្រនេះ។
របាយការណ៍របស់សមត្ថកិច្ចកងរាជអាវុធហត្ថ ក្រុងសៀមរាបបានឲ្យដឹងថា ឧទ្ទវហេតុនេះបានកើតឡើងនៅម៉ោង១០ព្រឹកថ្ងៃទី៧ខែមេសានេះ ស្ថិតនៅភូមិតាភុល សង្កាត់ស្វាយដង្គុំ ក្រុងសៀមរាប។
របាយការណ៍ឲ្យដឹងថា អគ្គិភ័យនេះ បណ្ដាលឲ្យបុរសពីរនាក់រងរបួស និងខូចខាតផ្ទះបីខ្នង ក្នុងនោះផ្ទះថ្មមួយខ្នង មានបីជាន់ ជាអាជីវករលក់ទូរសព្ទ និងផ្ទះឈើពីរខ្នងទៀតជាកន្លែងបោកអ៊ុត និងលក់និងបញ្ចូលហ្គាស។
របាយការណ៍បានបន្ថែមថា អគ្គិភ័យនេះ ដោយសារផ្ទុះធុងហ្គាស (បញ្ចូលហ្គាសខុសបច្ចេកទេស) ហើយក្នុងនោះក៏មានការខូចខាតសម្ភារៈមួយចំនួន ដូចជាម៉ូតូកង់បីសម្រាប់ដឹកធុងហ្គាសមួយគ្រឿង និងធុងហ្គាស់ជាច្រើនធុងផងដែរ។
របាយការណ៍ដដែលបានបញ្ជាក់ថា ករណីនេះអគ្គិភ័យនេះ សមត្ថកិច្ចប្រើប្រាស់រថយន្ដបាញ់ទឹកជាង១០គ្រឿង រួមមានរថយន្ដបាញ់ទឹក របស់នគរបាលខេត្ដសៀមរាប រថយន្ដកងរាជអាវុធហត្ថនិងរថយន្ដរបស់ព្រលានយន្ដហោះអន្ដរជាតិសៀមរាបផងដែរ។
សូមបញ្ជាក់ថា កាលពីដើមខែមីនាឆ្នាំ២០១៧នេះ តូបលក់ដូររបស់អាជីវករជិត១០០តូបនៅផ្សារពោធិលង្ការ ក្រុងសៀមរាប ក៏ត្រូវបានអគ្គិភ័យឆាបឆេះ ដោយសង្ស័យឆ្លងខ្សែចរន្ដរអគ្គិសនីពីបង្គោលភ្លើងក្បែរផ្សារ។
ក្រុមអាជីវករនៅផ្សារពោធិលង្ការឲ្យដឹងថា ឧបទ្ទវហេតុនេះ បណ្ដាលលមកពីឆ្លងខ្សែចរន្ដរអគ្គិសនីពីបង្គោលភ្លើងក្បែរផ្សារ ហើយរាលដាលចូលឆេះអីវ៉ាន់ក្នុងតូប ខណៈដែលខ្សែភ្លើងនៅលើបង្គោលភ្លើងនោះគ្មានការរៀបចំត្រឹមត្រូវតាមស្ដង់ដាទើបធ្វើឲ្យឆ្លងចរន្ដបែបនេះ។
មកដល់ពេលនេះ ក្រុមអាជីវករមិនទាន់មានតូបលក់នៅឡើយទេ ដោយបាននាំគ្នាលក់ដូរនៅតាមបណ្ដោយស្ទឹងសៀមរាប៕