មនុស្សយ៉ាងតិច១នាក់បានស្លាប់ ហើយ៥នាក់ទៀតបានរងរបួស បន្ទាប់ពីរថយន្តក្រុងឯកជនមួយគ្រឿងត្រូវភ្លើងឆាបឆេះកាលពីយប់ថ្ងៃសៅរ៍កន្លងមកនេះនៅឯខេត្តបាត់ដំបង។
លោក ធុច រ៉ា ស្នងការរងនគរបាលខេត្តបាត់ដំបងទទួលបន្ទុកផ្នែកពន្លត់អគ្គិភ័យបានថ្លែងប្រាប់វីអូឌី (VOD) តាមទូរស័ព្ទថា បុរសជាអ្នកដំណើរម្នាក់ត្រូវភ្លើងឆេះស្លាប់នៅក្នុងរថយន្តក្រុង ហើយអ្នកដំណើរ៥នាក់បានរងរបួស ក្នុងនោះស្ត្រី៣នាក់រងរបួសធ្ងន់ធ្ងរ នៅពេលរថយន្តក្រុងដឹកជញ្ជូនអ្នកដំណើររិទ្ធមុន្នី ត្រូវភ្លើងឆាបឆេះនៅម៉ោងប្រហែល១០និង៤០នាទីយប់ថ្ងៃសៅរ៍ នៅក្នុងសង្កាត់អូរម៉ាល់ ក្រុងបាត់ដំបង។
ទោះជាយ៉ាងណាមន្ត្រីនគរបាលរូបនេះបញ្ជាក់ថា លោកពុំទាន់ទទួលបានព័ត៌មានលម្អិតជាក់លាក់នៃអត្តសញ្ញាណជនរងគ្រោះនៅឡើយទេ ដោយសារអ្នកដំណើរនិងអ្នកបើកបររថយន្តនោះបានចាកចេញពីកន្លែងកើតហេតុអស់៕