សាលារាជធានីភ្នំពេញបានប្រកាសឲ្យប្រជាពលរដ្ឋចូលរួមអភិវឌ្ឍន៍តំបន់បឹងកក់ ខណៈពលរដ្ឋមួយចំនួនដែលមានជម្លោះដីធ្លីប្រមាណជិត១០ឆ្នាំ នៅមិនទាន់ទទួលបានដំណោះស្រាយ។
ថ្លែងក្នុងវេទិការសាធារណៈនៅព្រឹកថ្ងៃទី៧ កញ្ញា នេះ អភិបាលសាលារាជធានីភ្នំពេញ លោក ប៉ា សុជាតិវង្ស មានប្រសាសន៍ថា សាលារាជធានីគ្រោងនឹងអភិវឌ្ឍតំបន់បឹងកក់បន្ថែមទៀត ដោយធ្វើការកែរលម្អរហេដ្ឋារចនាសម្ពន្ធក្នុងតំបន់នោះឡើងវិញ។
លោកថា គម្រោងអភិវឌ្ឍន៍នឹងធ្វើឲ្យប៉ះពាល់ផ្ទះ ឬដីពលរដ្ឋមួយចំនួននៅតំបន់បឹងកក់ ដោយ សាលារាជធានីភ្នំពេញនឹងពង្រីកប្រពន្ធលូ និងផ្លូវតាមភូមិនីមួយៗមន្ថែមទៀត ក្នុងនោះក៏ត្រូវសង់ផ្លូវថ្មីមួយកាត់វិហារអ៊ីស្លាមអាល់សាកាល់។ ទោះជាយ៉ាងណា លោកស្នើឲ្យពលរដ្ឋមានការយោគយល់ និងសម្បទានចំពោះផលប៉ះពាល់។
លោកបន្ថែមថា៖“ព្រោះអភិវឌ្ឍតំបន់នេះ [តំបន់បឹងកក់] មិនអាចនិយាយថាជាផល ប្រយោជន៍របស់ក្រុមនេះ ក្រុមនោះ តែពីរ ឬបីនាក់បានទេ គឺ [តំបន់បឹងកក់] ជាតំបន់តែមួយដែលត្រូវអភិវឌ្ឍរួមគ្នា! អញ្ចឹងយើង [ជាពលរដ្ឋ] ត្រូវមានការយោគយល់ដើម្បីឲ្យតំបន់របស់យើងល្អប្រសើរ”។
ពលរដ្ឋម្នាក់ ដែលមានវត្តមានក្នុងវេទិការសាធារណៈ អ្នកស្រី ឌី សត្យា បានគាំទ្រចំពោះគម្រោងអភិវឌ្ឍន៍របស់សាលារាជធានីភ្នំពេញ ដោយអ្នកស្រីចង់បានផ្លូវ និងប្រព័ន្ធលូល្អ។
អ្នកបន្ថែមថា៖“គឺខ្ញុំសូមចូលរួមឯកភាព ព្រោះស្ថានភាពក្នុងការរស់នៅក្នុងតំបន់បឹងកក់ វាមាន បញ្ហាច្រើន ត្រូវទឹកលិចគ្រប់កន្លែង”។
ទោះយ៉ាងណាក៏ដោយ នៅក្នុងវេទិកាសាធារណៈ ដែលរៀបចំដោយសាលារាជធានីភ្នំពេញកាលពីព្រឹកមិញ មិនឃើញមានសកម្មជនដែលមានជម្លោះដីធ្លីរ៉ាំរ៉ៃ ហើយដែលមិនត្រូវបានដោះស្រាយសំណងជូនអស់ពេលជាង១០ឆ្នាំនោះទេ។
លោក ឌួង ឆើត ជាពលរដ្ឋម្នាក់ ដែលអះអាងថាមិនទាន់ទទួលបានសំណង។ លោកថា លោកមិនបានដឹងអំពីព័ត៌មានរៀបចំវេទិការសាធារណៈរបស់សាលារាជធានីភ្នំពេញនោះទេ។
លោក ឌួង ឆើត បន្តថា លោកមិនគាំទ្រគម្រោងអភិវឌ្ឍន៍របស់សាលារាជធានីភ្នំពេញ ដោយលោកស្នើឲ្យសាលារាជធានីភ្នំពេញ ដោះស្រាយសំណងជូនពួកគាត់ជាមុនសិន។ លោកថា ពលរដ្ឋបឹងកក់ចំនួន៧គ្រួសារទៀត នៅមិនទទួលបានសំណងនៅឡើយ។
លោកបន្ថែមថា៖“សំណូមពរឲ្យសាលារាជធានីភ្នំពេញហ្នឹង ហៅយើង (ពលរដ្ឋចំនួន៧គ្រួសារ) ដើម្បីទៅដោះស្រាយបញ្ចប់ (និង) ដើម្បីអភិវឌ្ឍន៍ទាំងអស់គ្នា ជៀសវៀងអភិវឌ្ឍតែបក្សពួកទុកឲ្យយើងនៅតែវេទនាតទៅទៀត” ។
នៅក្នុងវេទិការសាធារណៈកាលពីព្រឹកថ្ងៃទី៧ កញ្ញា នេះ ក៏បានយកបញ្ហាការសាងសង់ផ្លូវកាត់អ៊ីស្លាមអាល់សាកាល់មកជជែកពិភាក្សាផងដែរ។ ទោះជាយ៉ាង សេចក្តីសម្រេចណាមួយ នៅមិនទាន់ត្រូវបានធ្វើឡើងនៅឡើយ។ នេះបើតាមការឲ្យដឹងរបស់លោកអភិបាលសាលារាជធានីភ្នំពេញ។
រដ្ឋលេខាធិការក្រសួងសង្គមកិច្ច លោក អះម៉ាត់ យ៉ះយ៉ា ដែលធ្លាប់ដឹកនាំពលរដ្ឋខ្មែរអ៊ីស្លាមតវ៉ាប្រឆាំងការរុះរើរបងវិហារអ៊ីស្លាមអាល់សាកាល់ នាពេលកន្លងមក ប្រាប់អ្នកសាព័ត៌មានថា ពាក់ព័ន្ធគម្រោងសង់ផ្លូវកាត់វិហារនេះ ភាគីខ្មែរអ៊ីស្លាមមិនទាន់សម្រេចថាយ៉ាងណានោះទេ ដោយលោកថា រងចាំពលរដ្ឋជ្រើសរើតំណាំងដើម្បីធ្វើការចរចារ។
លោកបន្ថែមថា៖ “ពលរដ្ឋខ្មែរអ៊ីស្លាមដែលមកថ្វាយបង្គំព្រះនៅវិហារអាល់សាកាល់ គេសំណូមពរថាអភិវឌ្ឍចុះ ធ្វើផ្លូវចុះ គ្រាន់តែគាត់ថាសុំធ្វើវៀងតាមរបងហើយ ការធ្វើវៀងនេះខ្ញុំជឿថាធ្វើកើតមិនមែនធ្វើ អត់កើតទេ លើកលែងតែយើងអត់ចង់ធ្វើ”។
គម្រោងអភិវឌ្ឍតំបន់បឹងកក់របស់សាលាធានីភ្នំពេញនេះ ត្រូវបានពលរដ្ឋខ្មែរអ៊ីស្លាមមួយចំនួនជំទាស់ដោយសារការសង់ផ្លូវកាត់វិហារ ដែលពួកគេយល់ថានឹងធ្វើឲ្យប៉ះពាល់ឬរំខានដល់ការថ្វាយបង្គំព្រះ៕
