កម្ពុជាបានយល់ព្រមក្នុងការជួយសហការក្នុងការស្រាវជ្រាវស្វែងរកឆ្អឹងសាកសព របស់ទាហានវៀតណាម ដែលបានស្លាប់នៅក្នុងសម័យសង្គ្រាមនៅលើទឹកដីកម្ពុជាក្រោយការដួលរលំរបបខ្មែរក្រហម។
តាមការចុះផ្សាយរបស់សារព័ត៌មាន Vietnam News បានឲ្យដឹងថា ក្នុងកិច្ចប្រជុំគណៈកមា្មធិការពិសេសកម្ពុជាវៀតណាមកាលពីម្សិលមិញនៅក្នុងប្រទេសវៀតណាមបានឲ្យដឹងថា ខាងភាគីវៀតណាមផ្តល់ថវិការចំនួន៤២០ ០០០ដុល្លារ ដល់កម្ពុជា ដើម្បីជួយស្វែងរកឆ្អឹងសាកសពទាហានវៀតណាម ដែលស្លាប់នៅលើទឹកដីកម្ពុជា ក្នុងពេលសង្គ្រាមក្រោយការដូលរលំរបបខ្មែរក្រហម។
នៅក្នុងកិច្ចប្រជុំនៅក្នុងប្រទេសវៀតណាមកាលពីម្សិលមិញ ខាងភាគីកម្ពុជាដឹកនាំដោយលោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ ចំណែកភាគីវៀតណាមលោក Le Chiem ជាអនុរដ្ឋមន្ត្រីការពារជាតិ ។
តាមសារព័ត៌មាន Vietnam News គឺឆ្អឹងសាកសពទាហានវៀតណាមជិត៤០០០ ទៀតដែលស្លាប់នៅក្នុងសម័យសង្គ្រាមនៅកម្ពុជានៅមិនទាន់រកឃើញនៅឡើយ។ សារព័ត៌មាននេះ បន្តថា ដោយសារតែបាត់ព័ត៌មាន និង ទីតាំងមានការផ្លាស់ប្តូរ ទើបនាំឲ្យមានការលំបាកក្នុងការស្វែងរក៕
