មន្ត្រីទូតអាមេរិក លោកស្រី Samantha Power កាលពីថ្ងៃព្រហស្បតិ៍មិញ បានធ្វើដំណើរទៅកាន់ប្រទេសជប៉ុននិងកូរ៉េខាងត្បូង ដើម្បីជជែកជាមួយសម្ព័ន្ធមិត្តទាំងពីរ ជុំវិញគម្រោងដាក់ទណ្ឌកម្មបន្ថែមលើកូរ៉េខាងជើង ជុំវិញ ការបាញ់សាកល្បងអាវុធនុយក្លេអ៊ែនៅពេលថ្មីៗនេះ។
ក្នុងសេចក្តីការណ៍របស់អាមេរិកបញ្ជាក់ថា លោកស្រី Power នឹងជជែកពីដំណើរការនៃការដាក់ទណ្ឌ បន្ថែមលើ កូរ៉េខាងជើង ជាការឆ្លើយតបនឹងការសាកល្បងអាវុធនុយក្លេអ៊ែដែលបង្កការគំរាមកំហែងធ្ងន់ធ្ងរដល់សន្តិសុខ និងស្ថិរ ភាពក្នុងតំបន់។ នេះបើតាមការចុះផ្សាយរបស់ទីភ្នាក់ងារសារព័ត៌មានAFP។
ប្រេសិតអាមេរិករូបនេះ នឹងស្ថិតនៅក្នុងការបំពេញបេសកកម្មនេះ រហូតដល់ថ្ងៃអង្គារសប្តាហ៍ក្រោយ ហើយមានការប្រជុំជាមួយភាគីផ្សេងៗដែលរងឥទ្ធិពលគ្រោះថ្នាក់ពីសកម្មភាពរបស់ទីក្រុងព្យុងយ៉ាង។
អាមេរិកជាអ្នកដឹកនាំ ការចរចាដាក់ទណ្ឌកម្មថ្មីដើម្បីស្វែងរកដំណោះស្រាយនេះ បន្ថែមលើទណ្ឌដែលអង្គការ សហប្រជាជាតិ យល់ព្រមកាលពីខែមុនក្រោយពេលដែលកូរ៉េខាងជើងបាញ់សាកល្បងអាវុធនុយក្លេអ៊ែលើកទី៥ របស់ខ្លួន៕