នាវាផ្ទុកយន្តហោះចម្បាំងកងទ័ពជើងទឹកអាមេរិក Ronald Reagan បានធ្វើសមយុទ្ធយោធា ៣ថ្ងៃជាមួយនាវាពិឃាតជប៉ុនមួយគ្រឿង និងនាវាចម្បាំងឥណ្ឌា ២គ្រឿង នៅសមុទ្រជប៉ុន។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ដោយបានដកស្រង់សម្ដីកងទ័ពជើងទឹកជប៉ុននៅថ្ងៃនេះ Reuters បានរាយការណ៍បន្តថា សមយុទ្ធយោធានោះ មានការចូលរួមពីនាវាកងទ័ពជើងទឹក ៥គ្រឿង ហើយបានបញ្ចប់ទៅកាលពីថ្ងៃម្សិលមិញនេះ។
ប៉ុន្តែ Reuters បានកត់សម្គាល់ថា សមយុទ្ធយោធារួមគ្នានេះ បានកើតឡើងចំពេលដែលមានភាពតានតឹងនៅក្នុងតំបន់ ជុំវិញការសាកល្បងគ្រាប់បែកនុយក្លេអ៊ែរ និងគ្រាប់មីស៊ីលរបស់កូរ៉េខាងជើង ហើយវាក៏បានកើតឡើងចំពេលដំណើរទស្សនកិច្ចរបស់ប្រធានាធិបតីអាមេរិក លោក ដូណាល់ ត្រាំ ទៅកាន់ប្រទេសជប៉ុន កាលពីថ្ងៃអាទិត្យកន្លងមកនេះ ដែលជាផ្នែកមួយនៃដំណើរទស្សនកិច្ចរបស់មេដឹកនាំអាមេរិកនៅតំបន់អាស៊ីរយៈពេល ១២ថ្ងៃផងដែរ។
កងទ័ពជើងទឹកជប៉ុន បាននិយាយក្នុងសេចក្ដីប្រកាសព័ត៌មានមួយថា សមយុទ្ធយោធានោះ បានជួយកែលម្អជំនាញប្រយុទ្ធ និងពង្រីកបន្ថែមកិច្ចសហប្រតិបត្តិការជាមួយឥណ្ឌា៕
នាវាផ្ទុកយន្តហោះ Reagan ដែលមានទម្ងន់ដល់ទៅ ១សែនតោននោះ ត្រូវបានដាក់ឲ្យឈរជើងនៅជប៉ុន ដោយផ្ទុកយន្តហោះចម្បាំងប្រហែល ៧០គ្រឿង ហើយវាត្រូវបានគេចាត់ទុកជានាវាចម្បាំងដ៏មានអំណាចបំផុតរបស់កងទ័ពជើងទឹកអាមេរិក នៅតំបន់អាស៊ី៕
