ព្រះសង្ឃពុទ្ធសាសនាមួយអង្គ បានរងរបួសធ្ងន់ធ្ងរ បន្ទាប់ពីដុតព្រះកាយទាំងរស់ អំឡុងមហាបាតុកម្មប្រឆាំងនឹងប្រធានាធិបតី អ្នកស្រី ផាក ហ្គឹនហេ។ ដោយយោងតាមការផ្សាយរបស់ទីភ្នាក់ងារព័ត៌មានយ៉ុនហាប់ ដែលបានដកស្រង់សម្ដីមន្ត្រីកូរ៉េខាងត្បូង។
ព្រះសង្ឃដែលស្ថិតក្នុងព្រះជន្មខ្ទង់ ៦០ឆ្នាំ និងមិនត្រូវបានគេបញ្ជាក់ឈ្មោះនោះ បានដុតព្រះកាយកាលយប់ថ្ងៃម្សិលមិញ នៅកណ្ដាលទីក្រុងសេអ៊ូល ជាទីដែលមនុស្សរាប់ម៉ឺននាក់ បានបន្តបាតុកម្មនៅតាមដងផ្លូវនៅសប្ដាហ៍ទី ១១ ដើម្បីទាមទារឲ្យអ្នកស្រី ផាក ចុះចេញពីតំណែង។
ព្រះសង្ឃអង្គនោះ បានបន្សល់ទុកនូវកំណត់ហេតុមួយ ដោយជំរុញឲ្យអាជ្ញាធរចាប់ខ្លួនប្រធានាធិបតីរូបនេះ ដែលកំពុងរុំព័ទ្ធទៅដោយរឿងអាស្រូវពុករលួយ។
អ្នកស្រី ផាក ត្រូវបានសភាបោះឆ្នោតដកអំណាចកាលពីខែធ្នូឆ្នាំមុន ពាក់ព័ន្ធនឹងរឿងអាស្រូវប្រើប្រាស់ឥទ្ធិពល ដែលជំរុញឲ្យមានកំហឹងពីមហាជន និងផ្ទុះការតវ៉ានៅទូទាំងប្រទេស។
បើតាមយ៉ុនហាប់ ព្រះសង្ឃអង្គនោះ ក៏បានចោទអ្នកស្រី ផាក ថាជា “ជនក្បត់ជាតិ” ចំពោះការចុះហត្ថលេខាជាមួយជប៉ុន ដើម្បីដោះស្រាយសំណងសម្រាប់ស្ត្រីកូរ៉េ ដែលត្រូវបានទាហានជប៉ុនចាប់យកទៅរំលោភ នៅអំឡុងសង្គ្រាមលោកលើកទី២៕
