ពលរដ្ឋម៉ិកស៊ិកដែលខឹងសម្បារចំពោះការឡើងថ្លៃប្រេងសាំងយ៉ាងខ្ពស់នោះ នៅថ្ងៃនេះ បានចុះផ្លូវធ្វើបាតុកម្មនៅទីក្រុងម៉ិកស៊ិក ប៉ុន្មានថ្ងៃក្រោយពីបាតុកម្មនានា បានផ្ទុះឡើង និងបានលួចឆក់ប្លន់ហាងលក់ទំនិញរាប់រយកន្លែង មុននឹងឈានទៅចាប់ខ្លួនមនុស្សរាប់ពាន់នាក់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters រដ្ឋាភិបាលម៉ិកស៊ិកបានដំឡើងតម្លៃប្រេងពី ១៤ ទៅ ២០ភាគរយនៅដើមខែនេះ ដោយបានបញ្ឆេះកំហឹងពលរដ្ឋម៉ិកស៊ិក ដែលកំពុងតែប្រឈមមុខនឹងកំណើនអតិផរណារួចទៅហើយនោះ។
Reuters បន្តថា កំណើនតម្លៃប្រេងនេះ គឺជាផ្នែកមួយនៃការធ្វើសេរីភាពតូបនីយកម្មខាងតម្លៃរបស់ប្រធានាធិបតីម៉ិកស៊ិក លោក ប៉េណា នីតូ ដែលបានសន្យាអនុវត្តនៅឆ្នាំ។ ប៉ុន្តែ កិច្ចខិតខំប្រឹងប្រែងជាច្រើនរបស់រដ្ឋាភិបាល ដើម្បីកែសម្រួលតម្លៃប្រេងនេះ មិនត្រូវបានគេធ្វើដឹងធ្វើលឺនោះឡើយ។
អាជ្ញាធរម៉ិកស៊ិក បានរាយការណ៍អំពីការចាប់ខ្លួនមនុស្សជាង ១៥០០នាក់កាលពីថ្ងៃម្សិលមិញ ចាប់តាំងពីបាតុកម្មបានផ្ទុះឡើង នៅពេលតម្លៃប្រេងចាប់ផ្ដើមឡើងថ្លៃកាលពីថ្ងៃទី១ ខែមករានេះ។ អាជ្ញាធរក៏បានរាយការណ៍ផងដែរថា ហាងទំនិញជាង ៤០០កន្លែង នៅកណ្ដាលទីក្រុងម៉ិកស៊ិក ត្រូវបានគេឆក់ប្លន់៕
