ក្រុមហ៊ុនកូរ៉េខាងត្បូង Lotte Group បាននិយាយថា អាជ្ញាធរចិនបានបញ្ឈប់ការសាងសង់គម្រោងអចលនទ្រព្យតម្លៃពាន់លានដុល្លារមួយ នៅទីក្រុងស៊ិនយ៉ាង ស្ថិតនៅភាគឦសានប្រទេសចិន បន្ទាប់ពីការត្រួតពិនិត្យផ្នែកអគ្គិភ័យ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានដកស្រង់ព័ត៌មានពីប្រព័ន្ធផ្សព្វផ្សាយកូរ៉េខាងត្បូង ដែលបានចាត់ទុកការចុះត្រួតពិនិត្យរបស់អាជ្ញាធរចិនទៅលើគម្រោងអភិវឌ្ឍន៍អចលនទ្រព្យមួយថា ជាការសងសឹកទៅនឹងរដ្ឋាភិបាលកូរ៉េខាងត្បូង ដែលបានសម្រេចចិត្តដាក់ពង្រាយប្រព័ន្ធការពារមីស៊ីលរបស់អាមេរិក នៅលើដីមួយកន្លែងដែលជាកម្មសិទ្ធិរបស់ក្រុមហ៊ុន Lotte។
ដោយផ្អែកតាមប្រភពដែលបានដឹងបញ្ហានេះ Reuters បានចុះផ្សាយបន្តថា ចាប់តាំងពីខែធ្នូឆ្នាំមុន អាជ្ញាធរចិនបានធ្វើអធិការកិច្ចផ្នែកអគ្គិភ័យ ត្រួតពិនិត្យខាងអគារ ឬក៏ស៊ើបអង្កេតខាងពន្ធ នៅតាមបណ្ដាទីតាំងជំនួញភាគច្រើនរបស់ក្រុមហ៊ុន Lotte នៅក្នុងប្រទេសចិន ក្នុងនោះមានទាំងហាងលក់ទំនិញប្រហែល ១២០កន្លងផងដែរ។ ប៉ុន្តែ Reuters បានបញ្ជាក់ថា ប្រភពនោះ មិនត្រូវបានគេអនុញ្ញាតឲ្យពិភាក្សាបញ្ហានេះជាមួយប្រព័ន្ធផ្សព្វផ្សាយនោះឡើយ ដែលជាហេតុនាំឲ្យប្រភពបដិសេធបង្ហាញអត្តសញ្ញាណ។
ប្រព័ន្ធរ៉ាដាប្រឆាំងមីស៊ីលរបស់អាមេរិក មានសមត្ថភាពគ្របដណ្ដប់លើទឹកដីចិន ហើយក្រុងប៉េកាំងនិយាយថា ប្រព័ន្ធការពារមីស៊ីលរបស់អាមេរិកនេះ បានគំរាមកំហែងលើសន្តិសុខផ្ទាល់របស់ប្រទេសចិន និងថា វាមិនអាចកាត់បន្ថយភាពតានតឹងនៅឧបទ្វីបកូរ៉េបាននោះឡើយ៕