លោកនាយករដ្ឋមន្រ្តី ហ៊ុន សែន ព្រមានបិទស្ថាប័នមីក្រូហិរញ្ញវត្ថុណាដែលលោកចាត់ទុកថា មិនបានអប់រំអ្នកខ្ចីប្រាក់ឲ្យយល់ច្បាស់ពីរឿងបំណុលរបស់ឯកជន ហើយអាចមានការភាន់ច្រឡំនឹងបំណុលរបស់រដ្ឋ ដោយទំនងខ្លាចប៉ះពាល់ដល់មុខមាត់គណបក្សកាន់អំណាច។
នៅក្នុងពិធីបញ្ចុះសីមាព្រះវិហារវត្តព្រែកប្រា ក្នុងខណ្ឌច្បារអំពៅ នៅព្រឹកនេះ លោក ហ៊ុន សែន បានបញ្ជាឲ្យលោក ជា ចាន់តូ អគ្គទេសាភិបាលធនាគារជាតិ ប្រាប់ទៅម្ចាស់ស្ថាប័នមីក្រូហិរញ្ញវត្ថុ ឲ្យអប់រំបុគ្គលិកថា លុយដែលពលរដ្ឋខ្ចីនោះ គឺជាលុយឯកជន ហើយមិនពាក់ព័ន្ធរដ្ឋាភិបាលនោះទេ។ លោកមានប្រសាសន៍ថា៖ «តាមគ្រឹះស្ថានទាំងអស់ ទាំងសាខា ទីស្នាក់ការធំរបស់គាត់ក៏ត្រូវដាក់គឺជាគ្រឹះស្ថានមីក្រូហិរញ្ញវត្ថុឈ្មោះ«ក» ជាគ្រឹះស្ថានឯកជនមិនមែនរបស់រដ្ឋ។ រួចហើយត្រូវអប់រំបុគ្គលិកឲ្យនិយាយភាសាមុនគេថា នេះជាផ្នែកឯកជនមិនមែនរបស់រដ្ឋ។ បើមិននិយាយអាហ្នឹងទេ គឺចាំបង្ខំត្រូវបិទ។ […] បើមិនដូច្នោះទេ ពលរដ្ឋនៅតែយល់ច្រឡំថាអាហ្នឹងជារបស់រដ្ឋ ជំពាក់លុយរដ្ឋ»។
លោក អ៊ិន ចាន់នី ប្រធានអគ្គនាយកធនាគារ អេស៊ីលីដា មានប្រសាសន៍ថា តាមធម្មតាអ្នកដែលខ្ចីលុយពីគ្រឹះស្ថានមីក្រូហិរញ្ញវត្ថុឬធានាគារ បានដឹងហើយ ព្រោះកិច្ចសន្យាបានបញ្ជាក់ច្បាស់តែលោកថា ស្ថាប័នលោកនឹងបន្តពន្យល់ទៀត។ លោកបន្តថា៖ «ក្នុងវិស័យធនាគារគឺច្បាស់លាស់ណាស់ គាត់ចូលមកធនាគារ ហើយធនាគារគឺជាធនាគារឯកជន។ មិនមែនថាមិនធ្វើអ្វីសោះទេ ព្រោះគ្រប់អ្នកខ្ចីទាំងអស់យើងតែងតែពន្យល់ នៅក្នុងកិច្ចសន្យាហ្នឹងខ្ចីប៉ុន្មាន? នៅគ្រប់កិច្ចសន្យាទាំងអស់មានវិន័យឥណនទានមុននឹងផ្តល់។ ការងារហ្នឹងសំខាន់ណាស់ត្រូវឲ្យគាត់យល់ថាអ្នកណាជាម្ចាស់បំណុល អ្នកណាជាកូនបំណុល ទាំងអស់ត្រូវតែដឹង។ យើងបន្តធ្វើកិច្ចការងារហ្នឹង»។
លោក ហ៊ុន សែន ក៏បានព្រមានផងដែរដល់គណបក្សនយោបាយមួយចំនួន ដែលលោកថាបានដើរនិយាយពីរឿងលុបបំណុលជំនួសពលរដ្ឋ។ លោកបានបញ្ជាឲ្យចាប់វាយខ្នោះនៅនឹងកន្លែងតែម្តង។ លោកព្រមានថា៖ «អ្នកឯងមកបោកប្រាស់អី? ព្រោះវាដើរបោកព្រះរាល់ថ្ងៃនេះ ថាបោះ [ឆ្នោត] ឲ្យខ្ញុំទៅខ្ញុំឈ្នះខ្ញុំលុបចោលបំណុល។ ចឹងយើងដាក់អាហ្នឹងដាក់លេងអាហ្នឹងឲ្យធ្ងន់មើល។ តាមមូលដ្ឋានចាប់ចងស្លាបសេកនៅហ្នឹង បញ្ជូនទៅតុលាការកាត់ទោស»។
កាលពីថ្ងៃទី២ ខែកុម្ភៈ ឆ្នាំ២០១៥ ក្រសួងសេដ្ឋកិច្ចនិងធនាគារជាតិ បានចេញសេចក្តីថ្លែងការណ៍ថា គ្រឹះស្ថានមីក្រូហិរញ្ញវត្ថុ ដែលមានអាជ្ញាប័ណ្ណ ពុំមែនជារបស់រដ្ឋទេ ព្រមទាំងថ្កោលទោស ចំពោះអង្គការមិនមែនរដ្ឋាភិបាល សមាគម និងឈ្មួញឱ្យខ្ចីចងការប្រាក់ទាំងនោះ ឱ្យបញ្ឈប់ជាបន្ទាន់នូវសកម្មភាពកេងប្រវ័ញ្ចនេះ។
ក្រោយពីការប្រកាសរបស់ក្រសួងដូចនេះ អង្គការមិនមែនរដ្ឋាភិបាលនិងសមាគមប្រមាណជា២៤០ស្ថាប័ន ក្នុងចំណោម៤២០ស្ថាប័ន បានមកដាក់ពាក្យសុំចុះបញ្ជី ដើម្បីសុំការអនុញ្ញាតពីធនាគារជាតិនៃកម្ពុជាក្នុងប្រតិបត្តិការផ្ដល់សេវាឥណទាន។
កាលពីនៅរស់ លោក កែម ឡី ជាអ្នកស្រាវជ្រាវពីការអភិវឌ្ឍសង្គមនិយាយថា តាមស្ថិតិសមាគមមីក្រូហិរញ្ញវត្ថុ បង្ហាញថា នៅក្នុងឆ្នាំ២០១៥ មានអ្នកជំពាក់លុយស្ថាប័នមីក្រូហិរញ្ញវត្ថុ ចំនួន១,៨លានបំណុល ក្នុងស្ថាប័នមីក្រូហិរញ្ញវត្ថុតែ៥៧ស្ថាប័នជាសមាជិក។ លោកថា ចំនួនអ្នកជំពាក់បំណុលឆ្នាំ២០១៥ មានការកើនឡើងខ្ពស់បើធៀបនឹងឆ្នាំ២០០០ ដែលមានតែប្រហែល ៤៨០ ០០០បំណុល ប៉ុណ្ណោះ។
លោក កែម ឡី កាលណោះមើលឃើញថា ប្រជាពលរដ្ឋ ៩១ភាគរយ មានការព្រួយបារម្ភពីលទ្ធភាពនៃការសងបំណុល មីក្រូហិរញ្ញវត្ថុ។ ចំណែកប្រជាពលរដ្ឋ ៤៥ ភាគរយ ព្រួយបារម្ភពីការរឹបអូសទ្រព្យសម្បត្តិ ដោយការលក់ផ្ទះនិងលក់ដី ដើម្បីសងបំណុលមីក្រូហិរញ្ញវត្ថុវិញ៕
រាយការណ៍បន្ថែមដោយ លោក ហួត វុទ្ធី