ក្រុមមន្ត្រីឥណ្ឌូនេស៊ីនិយាយថា ប៉ូលិសនៅទីក្រុងហ្សាកតា បានហាមឃាត់ការប្រមូលផ្ដុំរៀបចំដោយក្រុមឥស្លាមជ្រុលនិយម នៅមុនការបោះឆ្នោតជ្រើសរើសអភិបាលក្រុងហ្សាកាតា នៅសប្ដាហ៍ក្រោយនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បាតុកម្មនៅថ្ងៃទី១១ ខែកុម្ភៈ ពោលគឺបួនថ្ងៃមុនថ្ងៃបោះឆ្នោតនោះ គឺជាការតវ៉ាថ្មីបំផុតនៅក្នុងចំណោមមហាបាតុកម្មជាហូរហែររបស់ក្រុមមូស្លីម ប្រឆាំងនឹងអភិបាលក្រុងហ្សាកាតា ដែលជាគ្រឹស្តសាសនិក ហើយត្រូវបានក្រុមឥស្លាមជ្រុលនិយមចោទថា បានប្រមាថមើលងាយគម្ពីកូរ៉ាន់។
ការតវ៉ាដែលដឹកនាំដោយក្រុមប្រកាន់តឹង និងមានការចូលរួមពីមនុស្សរាប់ពាន់នាក់នោះ បានជំរុញឲ្យមានក្ដីបារម្ភអំពីអំពើហិង្សាខាងសាសនា និងអស្ថេរភាពនយោបាយ នៅក្នុងប្រទេសឥណ្ឌូនេស៊ី ដែលជាប្រទេសមានប្រជាជនមូស្លីមធំបំផុតនៅលើពិភពលោក។
ប៉ូលិសនិយាយថា កាលពីសប្ដាហ៍ ពួកគេបានទទួលសេចក្ដីជូនដំណឹងពីក្រុមអ្នករៀបចំការតវ៉ានេះ ដែលដឹកនាំដោយរណសិរ្សអ្នកការពារឥស្លាម។
អ្នកនាំពាក្យប៉ូលិសក្រុងហ្សាកាតា លោក អាហ្កូ យូវ៉ូណូ បានប្រាប់ថា ប៉ូលិសនឹងមិនអនុញ្ញាតនោះឡើយ។
កាលពីថ្ងៃម្សិលមិញនេះ ស្នងការប៉ូលិសឥណ្ឌូនេស៊ីបានប្រាប់អ្នកសារព័ត៌មានថា បាតុកម្មនោះ ត្រូវបានគេសង្ស័យថាមានចរឹតនយោបាយ និងកើតឡើងយ៉ាងប្រកៀកប្រកិតនឹងពេលវេលាដែលបេក្ខជនទាំងអស់ ព្រមទាំងអ្នកគាំទ្ររបស់ពួកគេ ត្រូវបានតម្រូវឲ្យបញ្ឈប់ការឃោសនានៅត្រឹមថ្ងៃទី១១ ខែកុម្ភៈ៕