រដ្ឋមន្ត្រីការបរទេសចិន លោក វ៉ាង យី បានថ្លែងនៅឯប្រទេសអូស្ត្រាលីថា សហរដ្ឋអាមេរិកត្រូវតែរំលឹកឡើងវិញពីប្រវត្តិសាស្ត្ររបស់ខ្លួននៅតំបន់សមុទ្រចិនខាងត្បូង ខណៈដែលកិច្ចព្រមព្រៀងនានាទាក់ទងនឹងសង្គ្រាមលោកលើកទី ២ បានចែងថា ទឹកដីចិនទាំងឡាយដែលជប៉ុនដណ្ដើមកាន់កាប់ ត្រូវតែប្រគល់ត្រឡប់ទៅឲ្យចិនវិញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ប្រទេសចិនបានអាក់អន់ស្រពន់ចិត្តដោយសារតែសេចក្ដីអត្ថាធិប្បាយនានាពីសំណាក់រដ្ឋបាលថ្មីរបស់អាមេរិក អំពីដែនទឹកមានជម្លោះនោះ។
រដ្ឋមន្ត្រីការបរទេសអាមេរិក លោក Rex Tillerson បាននិយាយថា គេមិនគួរអនុញ្ញាតឲ្យចិនប្រើប្រាស់សំណង់ដែលចិនសាងសង់នៅលើកោះនានានោះឡើយ។ សេតវិមានក៏បានប្ដេជ្ញាផងដែរថា នឹងការពារដែនទឹកអន្តរជាតិ នៅក្នុងច្រកសមុទ្រយុទ្ធសាស្ត្រនេះ។
ទោះជាយ៉ាងណា រដ្ឋមន្ត្រីការពារជាតិអាមេរិក លោក Jim Mattis កាលពីសប្ដាហ៍មុន បានលើកឡើងថា វិស័យកាទូតគួរតែផ្ដោតអាទិភាពទៅលើសមុទ្រចិនខាងត្បូង។
នៅលើវេបសាយរបស់ក្រសួងការបរទេសចិននៅល្ងាចថ្ងៃម្សិលមិញនេះ លោក វ៉ាង យី ត្រូវបានគេដក់ស្រង់សម្ដីចុះផ្សាយថា អាមេរិកត្រូវរៀនពីប្រវត្តិសាស្ត្រសង្គ្រាមលោកលើកទី ២ ឡើងវិញ។
លោក វ៉ាង ថ្លែងថា សេចក្ដីថ្លែងការណ៍ទីក្រុងគែរឆ្នាំ១៩៤៣ និងសេចក្ដីថ្លែងការណ៍ទីក្រុងផតស្ដាមឆ្នាំ១៩៤៥ បានចែងយ៉ាងច្បាស់ថា ជប៉ុនត្រូវតែប្រគល់ត្រឡប់ទៅឲ្យចិនវិញ នូវទឹកដីចិនទាំងអស់ដែលជប៉ុនបានដណ្ដើមយក។
បើតាមលោក វ៉ាង សេចក្ដីថ្លែងការណ៍ទាំងនោះ បានគ្របដណ្ដប់ទៅលើប្រជុំកោះណាន់ហ្សាផងដែរ ដែលអន្តរជាតិស្គាល់ថា ប្រជុំកោះស្ព្រាតលី៕