ប្រធានពន្ធនាគារត្រពាំងផ្លុងថ្លែងថា រហូតដល់ល្ងាចថ្ងៃព្រហស្បតិ៍នេះ លោកមិនទាន់ទទួលបានលិខិតពីតុលាការកំពូល ដើម្បីនាំលោក កឹម សុខា ចូលរួមសវនាការសវនាការសុំនៅក្រៅឃុំនៅថ្ងៃសុក្រស្អែកនេះនៅឡើយទេ។
ប្រធានពន្ធនាគារត្រពាំងផ្លុង លោក ភិន យ៉ាន ប្រាប់វីអូឌីនៅថ្ងៃល្ងាចនេះថា លោកនៅមិនទាន់ទទួលបានលិខិតពីតុលាការឲ្យនាំខ្លួនលោក កឹម សុខា ទៅចូលរួមសវនាការនៅឡើយទេ ប៉ុន្តែលោកថា ប្រសិនល្ងាចនេះលោកទទួលបានខាងពន្ធនាគារនឹងនាំទៅ។
លោកថា៖ «ខ្ញុំអត់ទាន់មានគោលការណ៍អីត្រូវដឹងជញ្ជូនអត់ផង។ បាទអត់ទាន់បានទទួលផង»។
វីអូឌី មិនទាន់អាចសាកសួរលោក នៅ មុនីជោត អ្នកនាំពាក្យតុលាការកំពូលបានទេនៅថ្ងៃនេះ ដោយទូរសព្ទមិនអាចទាក់ទងបាន។
តុលាការកំពូលនឹងបើកសវនាការលើបណ្ដឹងសុំនៅក្រៅឃុំរបស់មេធាវីការពារក្ដីឲ្យលោក កឹម សុខា នៅថ្ងៃស្អែកនេះ។
កាលពីថ្ងៃទី១ខែកុម្ភៈ សាលាឧទ្ធរណ៍បានបើកសវនាការសុំនៅក្រៅឃុំលើសំណុំរឿងនេះ ហើយសមត្ថកិច្ចបាននាំខ្លួនលោក កឹម សុខា ចេញពីពន្ធនាគារត្រពាំងផ្លុងតាំងពីរម៉ោង២យប់ធ្វើដំណើរមកកាន់ភ្នំពេញ៕