ប្រមុខការទូតជប៉ុន បានជំរុញទៅមេដឹកនាំកម្ពុជា ឲ្យរៀបចំការបោះឆ្នោតដោយសេរីត្រឹមត្រូវនាពេលខាងមុខនេះ ខណៈដែលមេដឹកនាំកម្ពុជាបញ្ជាក់ថា វិវាទនយោបាយកម្ពុជា មិនមានក្នុងរបៀបវារៈនៃជំនួបនោះ។
រដ្ឋមន្ត្រីការបរទេសជប៉ុន លោក តារ៉ូ កូណូ បានធ្វើដំណើរបំពេញទស្សនកិច្ចនៅកម្ពុជានៅថ្ងៃនេះ ដើម្បីចុះហត្ថលេខាលើកិច្ចព្រមព្រៀងផ្ដល់ជំនួយឥតសំណង និងកម្ចីហិរញ្ញប្បទានសរុបជាង ៩០លានដុល្លារ។
ក្រៅពីពិធីនេះ ប្រមុខការទូតជប៉ុនរូបនេះ ក៏បានជួបពិភាក្សាដោយផ្ទាល់ជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព។
ទំព័រហ្វេសប៊ុកផ្លូវការរបស់លោក ហ៊ុន សែន និងសារព័ត៌មានស្និទ្ធនឹងរដ្ឋាភិបាល Fresh News សុទ្ធតែអះអាងថា ប្រមុខការទូតជប៉ុនរូបនេះ មិនបានលើកឡើងពីបញ្ហានយោបាយកម្ពុជាជាមួយលោកនាយករដ្ឋមន្ត្រី ហ៊ុន សែន នោះឡើយ។
ប៉ុន្តែ សារព័ត៌មានជប៉ុន NHK បានចុះផ្សាយនៅថ្ងៃនេះថា លោក កូណូ បានជំរុញទៅលោក ហ៊ុន សែន ឲ្យរៀបចំការបោះឆ្នោតដោយសេរី និងត្រឹមត្រូវ។
សារព័ត៌មានជប៉ុនមួយនេះ បានដកស្រង់សម្ដីប្រមុខការទូតជប៉ុន ដែលបាននិយាយថា ការបោះឆ្នោតនាពេលខាងមុខ គួរតែឆ្លុះបញ្ចាំងឲ្យត្រឹមត្រូវពីឆន្ទៈរបស់ប្រជាពលរដ្ឋ។
ជាមួយគ្នានោះដែរ លោក កូណូ បានដកស្រង់សម្ដីលោក ហ៊ុន សែន ដែលបានអះអាងប្រាប់រូបលោកថា ការបោះឆ្នោតនាពេលខាងមុខ នឹងមានលក្ខណៈសេរី និងត្រឹមត្រូវ។
បើតាមសារព័ត៌មានដដែលនេះ លោក កូណូ បាននិយាយថា ជប៉ុននឹងបន្តតាមដានស្ថានការណ៍នយោបាយនៅកម្ពុជា ខណៈដែលបញ្ជាក់ថា ជប៉ុនជាមិត្តយូរអង្វែងជាមួយកម្ពុជា និងមិនចង់ឃើញប្រទេសមួយនេះ ប្រឈមមុខនឹងការរិះគន់នោះឡើយ។
ទោះជាយ៉ាងណា ដំណើរទស្សនកិច្ចប្រមុខការទូតជប៉ុននៅកម្ពុជានេះ បានកើតឡើងចំពេលដែលព្រះមហាក្សត្រកម្ពុជា ព្រះបាទ នរោត្ដម សីហមុនី បានយាងទៅបំពេញទស្សនកិច្ចនៅក្នុងប្រទេសជប៉ុនផងដែរ។
នៅវិវាទនយោបាយកម្ពុជាថ្មីៗនេះ ក្រុមមេដឹកនាំគណបក្សសង្គ្រោះជាតិ ដែលត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុននោះ រំពឹងថា រដ្ឋាភិបាលជប៉ុននឹងជួយសម្របសម្រួលបញ្ចប់ជម្លោះនយោបាយមួយនេះ ហើយអាចជួយឲ្យកម្ពុជាងាកទៅដើរលើផ្លូវមួយ ដែលសហគមន៍អន្តរជាតិហៅថា គន្លងលទ្ធិប្រជាធិបតេយ្យសេរីពហុបក្ស៕